July 31, 2023; Nimin July 30, 2023 (Pathianni) tlai khan Serchhip Dinthar Vengsang-ah chenna In pakhat chimin vanneihthlak takin mihring thi leh hliam an awm lo.

Thudawnna Lenkawl in a tarlan danin, nimin-a chenna In chim hi Lalrozama te In niin AssamType building a ni a, he In-ah hian In neitute nupa leh an fate pahnih bakah In neitu Lalrozama farnu fa, kum 9 mi, an vaiin mi 5 an khawsa a, In neitu Lalrozama nupui Lalrampari sawi danin, an In kawt lama lungrem chungah bathroom leh inthiarna siamin inthiarna hnuaiah hian Sazu ten kua an nei a, nimin chhunlai vel atang khan lungrem hi che deuhin nimin tlai dar 5 vel, ruah sur zawh hnu khan ri a hriat avangin In hnuaiah zuk kalin lungrem hi a lo che a, a tlanchhoh leh chuan lungrem hi chimin In hi a tlukpui ta niin a sawi.

Vanduaina thlen lai hian In neitunu Lalrampari leh Jackson Lalhriatrenga te hi In-ah awmin In neitunu hi a tlanchhuak a, Jackson-a bakah an bungrua zawng zawngte In hian chimpuiin vanneihthlak takin Jackson Lalhriatrenga hian hliam a tuar lo a ni.

Vanduaina tawk te bungrua lakchhuah hna hi nimin tlai khan mi tlawmngai ten thawk nghalin vawiin hian In chhia senghawi hna hi khawtlang huap hnatlanga neih nghal a ni anga, Bawrhsap mawhphurhna la mektu Addl. DC James Lalnithanga pawhin nimin tlai khan tlawhin tanpuina awm thei ang te ngaihtuah sak an ni dawn a, bialtu MLA Lalduhoma aiawhin an Party hruaitu ten silpauline pahnih (2) an pe nghal bawk a ni.