September 1, 2023; Kumin March 17-a Serchhip District Jail atanga tang tlanchhuak zinga mi Lalzuimawia (24), Zokhawthar chu tunkar Thawhlehni khan Aizawl-ah man a ni a, Serchhip-ah hruaichhoh niin Serchhip District Court-a hruai a nih hnuah Serchhip District Jail-ah dahluh a ni.

Lenkawl in a tarlan danin, kumin March ni 17-a Serchhip District Jail atanga tang tlanchhuak mi pathum zinga mi Lalzuimawia (24) S/o Liankhuma (L), Zokhawthar hi Aizawl-ah a awm tih report an dawn avangin CID (SB) hotute be nghalin a hnu chhui nghal a ni a, Ramhlun Vengthar-ah a awm tih hriat zui nghal a ni a, Aizawl Police Station-a thawktute leh Bawngkawn Police Station-a thawktute pawh hriattir nghal niin chak taka hmalak nghal a ni a, tunkar Thawhlehni (Aug. 29, 2023) chawhnu lam khan an man zui ta a ni.

Tang tlanchhuak an man hi Bawngkawn Police Station-ah hruai niin August ni 30, 2023 khan Serchhip Police ten an la a, hemi tlai hian thlenpui leh niin th zawhfiah ngai ang ang te zawhfiah a nih hnuah nimin khan Serchhip District Court-ah hruaiin Serchhip District Jail-ah dahluh nghal a ni.

Kumin March ni 17 khan Heroin kaihhnawih a man Serchhip District Jail-a tang mek mi 4 te chu Serchhip District Court-a an inlan zo District Jail a khung leh tura Jail kawt-a Motor atanga an chhuk chu an pali hian tlanchhuah an tum a, an zinga mi pakhat chu man hman niin midang pathum- David Lalremruata (30) leh Lalzuimawia (24), Zokhawthar nia insawi bakah Lalnunhlima (32), New Serchhip te chu Jail hungna sir lamah tlan liamin man hman an ni ta lo a ni.

Lalzuimawia hi David Lalremruata nen kumin March ni 4 zan khan Heroin Hawng 5 man kaihhnawih ah manin thubuai siam sak an ni a, man a nih leh hnua Police te hnena a sawi danin, Vanchengte-ah lutin Lalnunhlima hi a chhungte In-ah kalin an nghak a, an nghahchhuah zawh loh hnuah kalsanin Serchhip lamah rawn let lehin ni 5 hnuah ke in Seling lam an pan a, heta tang hian Champhai-ah chhoin Zokhawthar-a an In an tlawh hnuah Lalnunhlima nupui hmuh tumin Myanmar ah an kal a, hemi hnu hian Tiau-ah In luahin David-a nen hian an khawsa zui ta tih a sawi a. Aizawl-a awm a nupui leh a fa hmuh tuma Aizawl-a a chhuk chu Police te hian an lo man ta a ni.

Serchhip Police Station-a thawktute chuan tang tlanchhuak manna tur kawnga an thawhpui Aizawl lam leh Serchhip-a an hotu lian te chungah lawmthu an sawi.