Aizawl: Serchhip District Jail-a Home Guard duty, Lalrinthanga chuan an thawhpui, Lalhruaitluanga @ Mapuia chu nimin zing dar 2:00 ve khan a duty-naa a ken silai, SLR hmangin a kap a, Mapuia hi Serchhip District Hospital panpui a nih hnuah a boral.

Serchhip District Jail-a duty ve bawkte hnen atanga thudawn danin guardman Lalrinthanga (24), Bawktlang hi Zirtawp zan dar 12:00 atanga dar 2:00 thleng khan Serchhip District Jail-ah hian duty-in guardman Lalhruaitluanga (34), Chhingchhip Venglai hi dar 2:00 atanga zing dar 5:00 thlenga duty tur a ni thung.

Lalhruaitluanga te hi chengkawl khawrha ram chhuakin an rawn haw hnu lawkah he vanduaina hi thleng a ni a, silaimu hi Lalhruaitluanga nak vei lamah lutin ding lamah a tlang niin a lang a, he vanduaina thleng hi hriat a nih veleh district jail-a thawk dangten Lalhruaitluanga hi buaipui nghalin damdawi in an panpui nghal a, Mercy Hospital-ah kalpui phawt ni mah se, doctor an awm loh avangin Serchhip District Hospital panpui leh a ni a, damdawi in thlenpui a nih hnu lawk hian a boral zui ta a ni.

He thu buatsaih lai hian Lalhruaitluanga ruang hi postmortem tura ruahman mek a ni a, nimin tlai dar 2:00 khan Chhingchhip Venglai-a an chenna inah vui a ni.

Barrick-a he thil a thlen lai hian mi dang awm an awm ve loh avang leh Lalrinthanga hi police-te kutah awma thu zawh fiah a la nih loh avangin thil thlen dan kimchang hi hriat theih a la ni lo thung.