March 7, 2024; East Tuipui bialtu MLA Ramthanmawia'n a bial chhung Sesih PHC ah IV grade pakhat (1) chiah thawktu a awm mek tih a sawi a, thawktu dah belh vat turin sawrkar a ngen.

Assembly budget session neih mek a zawhna leh chhanna hun ah he thu hi sawiin, East Tuipui bialtu MLA chuan, Sesih PHC doctor chu tunhnai ah sawn a ni tih sawiin, a ai dah a nih loh chungchanga health minister chhanna thlamuang takin an nghak tih a sawi.

Ramthanmawia tarlan danin, sawrkar hmasa ah Sesih PHC ah hian SEDP hmangin staff nurse leh technician rawih a ni a, hei hi tunhnai ah ban an ni. Tun a an PHC a thawktu awm chu staff nurse pakhat leh IV grade pakhat chiah a ni.

Hetihlai hian staff nurse awm mekin loh theih loh avangin maternity leave a la a, hemi vang hian Sesih PHC a thawktu awm chu IV pakhat chiah a ni mek.

"Damdawiin hi kan khar mai dawn nge, nau nei tur ten lo pan ta se...kan damdawiin hi chu khar ngai hial khawpin kan awm a ni," East Tuipui bialtu MLA chuan a ti.

Hemi chungchangah hian health minister Lalrinpuii chuan Sesih leh hmun dangte dinhmun en turin a hmunah an kal dawn tih a sawi a, an mu tan ber chu manpower a ni tih a sawi. "IV grape pakhat chauh Sesih PHC a a awm hi pawi ka ti a, kan nei thuai tura ngaih a ni," a ti.