Aizawl: February ni 17 atanga March ni 4, 2020 inkar chhunga Assembly budget session neih turah zawhna lut a awm nual tawh.
Zalen palaiin Assembly Secretariat atanga thu a dawn danin session atan hian Zirtawpni thleng khan house-a chhan chi zawhna (starred question) 183, ziaka chhan chi zawhna (unstarred question) 114 leh private member resolution 4 a lut tawh a, zawhna hi a luh belh zel bawk.
Speaker hova Business Advisory Committee-in ruahmanna an siam dan chuan session tan ni hian Larsapin house-ah thu a sawi ang a, a tukah Larsap thusawi vanga lawmthu sawina motion sawihoin pass tum a ni ang. February ni 19-ah Chief Minister-in budget a pharh ang a, ni 20 chawlin Feb. 21-ah private member resolution sawiho a ni ang. Feb. 24&25-ah budget a tlangpuia sawihona (general discussion) neih a ni ang a, Feb.26 atangin Minister hrang hrangte demand sawiho tan a ni ang.