Session lehah Mizo Language Board put luh beisei

Admin - Oct 03, 2021

Mizo Language Board hi MBSE ang deuha kal tur a ni

Aizawl: Mizoram Legislative Assembly session neih leh hmasak berah Mizo Language Board dinna tur bill putluh beisei a ni.

Human Resources Development Board Vice Chairman L.Thangmawia hnen atanga ZALEN thudawn danin Mizo Language Board hi Mizoram Board of School Education ang deuha kal (function) tur a ni a, Board dinna atan hian ruahmanna pawh peih a ni tawhin Law department pawh a paltlang tawh niin a sawi. Mizo Language Board din a tul chhan sawiin L.Thangmawia chuan, "Mizo tawnga thuneitu an awm lo hi a buaithlak a, tuna saptawng leh tawng dang te hi Mizo tawngah senglut dawn ta ila saptawng ang ngau ngau in nge kan sengluh ang a Mizo tawngin tih te hi a buaithlak a. Hma la tur tur kan nei lo hi a buaithlak a, tawng lama thuneitu kan neih ngei hi a tul a ni," a ti.

Human Resources Development Board Vice Chairman L.Thangmawia chuan Mizo Language Board din chu  2019 khan study committee din a ni tih sawiin chairman ah L.Thangmawia, secretary ah VL Krosshnehzova bakah member atan mithiam te ruat an ni tih a sawi a. Mizo Language Board chu Chairman, Secretary leh member atan mithiam te ruat tum a ni tih a sawi.

Mizote tobul hrang hrang te chhui a pawimawh thu sawiin "Lushai atanga Mizo kan nih dan te, Mizo tawng kan tih mai hi engtikah nge tawng thuhmun (common language) ah kan hman tih te, Mizo tawng hi tawng ral mai tur anga sawi hi a awmzel dan tur zirchian leh thildang te a chhuichiang thei dawn a ni," a ti bawk.

Share now