India hmarchhak kil khawra cheng Mizo te pawhin Over-The-Top (OTT) kan sawi ri ve ta fo mai a, Bollywood industry tan phei chuan thil thar a ni tawh lo. Nakkuma tlangzarh chauh tur ni mah se Shah Rukh Khan channa 'Jawan' chu streaming platform lar Netflix chuan cheng vaibelchhe 120 in an lei lawk hem mai! Netflix hian digital streaming rights an lei tihna a ni chu. 

Tun hnai khan Shah Rukh Khan chuan Instagram live-ah he film chungchang hi sawiin, "Kawng thui tak a la awm. Actor ka nih anga hun nuam tak ka hman mek tih loh chu 'Jawan' chungchang hi sawi tur ka nei lo. Tin, Atlee pawh," tiin, an director Atlee chungchang leh an film buaipui mek chungchang a sawi chhuak a, Netflix hnenah hian an hralh ngei em tih a sawi lang lo.

Jawan hi June 2, 2023-ah release a ni dawn a, English bakah - Hindi, Tamil, Telugu, Malayalam leh Kannada tawng ten tihchhuah a ni bawk ang. Indian film director lar Atlee-a film siam thar tur 'Jawan' ah hian Shah Rukh Khan leh Nayanthara te an inlan dawn tih a chian hnuah Deepika hming lam rik a ni ve leh tawh bawk. 

He film-ah hian Bollywood superstar Deepika Padukone leh Shah Rukh Khan te hi an changdun dawn a, Netflix lam hian a hit ringin digital streaming rights pawh hi manto taka lei an nih a rinawm.