—  C.Lalhmachhuana Vanneihthlak takin April ni 6-12,2015 inkar chhung khan Aizawl Municipal Council (AMC) bultumin Aizawl chanchinbu mi 10-te chuan Shimla khawpui enkawl dan chungchang a hmunah kan en a, chuta ka thil hmuh, ka awh em em leh Aizawl ngeiah pawh kan tih nghal theih chu an bawlhhlawh sawngbawl dan hi a ni a. Bawlhhlawhte hal mai mai lovin leitha siam nan leh fuel siam nan an hmang a, sumah an chantir hi kan khawpuiah hian bultan ve nghal nise a va tha dawn em! Shimla khawthlang lam km 20 velah bawlhhlawh sawngbawlna hmun (Solid Waste Manegement Plant) hi siamin kum 2011 atangin Hanjer Bio Tech Energies Pvt. Ltd. Rajasthan chuan an enkawl tan a, bawlhhlawh chu khawl hmanga thliar hrangin tawih thei chi chu leitha ah siam a ni a, a tawih thei lo (sarang/polythene etc.) atangin Re Defined Fuel an siam leh thin. Bawlhhlawh atanga leitha siamte hi kg khat Rs. 230 zelin Ambala leh Chandigarh-ah an hralh thin a, Re Difined Fuel hi kg. khat Rs. 10 zelin Ambuja Cement Company hnenah an hralh thin a, helai hmun enkawltu Maneger chuan leitha leh fuel hralhna ah harsatna an nei lo nia sawiin, “Kan pe daihlo zawk a ni,” tih a sawi hial a ni.Shimla Municipal Corporation leh Hanjer Bio Tech Energies Pvt. Ltd. Rajasthan te hian kum 25 chhung atan inremna hi siamin bawlhhlawh khawnkhawm leh a hmun phurh thlen hi Municipal lamin an thawk a, a sawngbawl hna hi Company lamin an thawk thung. Bawlhhlawh sawngbawlna khawl hian ni khatah bawlhhlawh metric ton 80 thleng a sawngbawl thei a, mahse tunah chuan ni khatah ton 50 atanga 60 inkar an sawngbawl thin a. Bawlhhlawh paih man ah hian thla tin mipui ten Rs. 50 an chawi ve thin a ni. Tin, an khawlai an vawngfai em em mai hi an awhawm ka ti hle bawk a. Khawlaiah bawlhhlawh paih mai mai an awm lo a, hmun hrang hrangah bawlhhlawh bawm an hung thluah mai a, a bawmah chauh an paih thin bawk. Hengte hi kan Aizawl khawpuia kan tih ve theih reng, mahse mi tam takin kan la tih loh mai mai a ni a. Mi faten an tih theih chuan engvangin nge kan tih theihloh bik ang tih hi ka rilru a zawhna leh chona lian tak awm nghal chu a ni. Tin, khawlaia bawlhhlawh paih te chu chawitir an ni dawn tih thuziak te, chil chhak, meizuk leh sarang lam chi reng reng khap anih thute kawngsirah ziakin an tara, hengte hi mipuiin an zawm tha hle tih a takin kan hmu a, a ropui hle a ni. Hun eng emaw ti laia Aizawlin kan buaipui Property Tax chungchangah Shimla Mayor Pu Sanjay Chauhan chuan ‘Property Tax chu an sum lakluhna hnar ber’ a ni tih amah hmutu Press mite a hrilh a. Hun kalta leh tuna kan thil tawn mekte kan thlir kir hian Mizote hian chhiah pek hi kan hreh deuh em aw? tih min ngaihtuahtir thin. Khawi ram leh sawrkar pawh mipuite chhiah pek tlingkhawm hmanga awm leh hnathawk thei chauh an ni a, kan ram ah ngei pawh mipuite chhiah pek tling khawm hmanga sawrkar hi kal hram hram chauh a ni. Chuvangin sawrkar chak leh hmasawnna hna thawk thei tur kan duh anih chuan engah nge ‘Chhiah pek’ hi kan hreh em em thin le? Chhiah hi pe tha ila, a hmanna lam pawh thlir/en uluk ila, mi corrupt an awm chuan an chungah kan thikthute pawh kan tichhe ve ang chu maw le. Chumi ni lova Chaw barh ngai, humhalh ngai, midangte puihna tel lova khawsa thei lo nia kan inhriat chhung chuan engah mah hma kan sawn thei lo ang tih hi a va hlauhawm em! Motor parking chung-chang hi han sawi kai leh lawk ila. Shimla khaw chhung kawng hi Aizawl khaw chhung kawng ai hian a te zawk a, mahse thunei-tuten motor dahna hmun tur an siamah chauh motor an dah avangin traffic jam tur nasa takin an pumpelh thei a ni. Tlangram khawpui ka kal ve tawhna Nagaland khawpui Kohima te, Sikkim khawpui Gangtok te khu khawpui chhung kawngah chuan Aizawl aiin a zim zawk a, kan Aizawl khawpuiah pawh hian kawng-sirah lirthei dah lovin kan sawrkar leh mi hausate hian lirthei dahna hmun hi han ruahman se chuan tuna kan harsatna lian tak traffic jam thin hi kan pumpelh ngei ang. Hei mai bakah Aizawla hmun lunlai deuhah te hian fly over leh kawng chhawng hi siam ni ve ta se kan harsatna tam tak hi a ziaawm thei dawn a ni. Thil lawmawm tak dang ka hmuh dang leh chu Shimla khawpui a mei zuk an khap leh sarang (polythene) an khap hi a ni. Meizuk hian a zu tu mai bakah a bulhnaia awmte tan a hlauhawm zia mi thiamten an sawi thin a. Chutiang bawkin polythene pawh hriselna atan a tha lo hle tih an sawi thin bawk. Heng mihring tana hlauhawm thil pahnih an khap thei te hi a ropui thlawt a, sawi nuam an ti em em pawh hi a awm reng a ni. Meizuk chung-changah mi thahnemngaite hmalakna avangin hmasawnna hmuh tur engemaw zat tawh mahse hmalakna tur a la tam hle a. Chutih rual erawh chuan polythene chungchangah erawh hma lak kan la ngai nasa hle a, kan bawlhhlawh paihna hmun leh luidungte han en ila polythene in a khat ta mai emaw tih tur a ni. Kan rama Cancer hluar em em chhan zinga pakhat te hi a ni thei mai lawng maw tih min ngaihtuah tir thei hial a ni. Shimla hi 35 sq.km vela zau niin mihring nuai 2 vel an cheng mek a, Municipal Council hian hna an thawh that vangin tum thum ‘Best City Award for Public Service’ lawmman an dawng tawh. An Municipal Council term hi kum 3 a niin Mayor leh Deputy Mayor te hi mipuiin direct in an thlang a, Municipal Ward 25 awmin seat 3 chu hnam tenau te tan hauhsak (reserved) a ni a, a dang 22 ah hian inthlan thin a ni a. Tun dihmunah Congress in Councillor 8, BJP in 10, Left party in 2 leh Independent in Councillor 2 an nei mek a ni. Aizawl Municipal Council kalphung nen an danglamna lian tak chu Executive Councillor an nei ve lo a, Mayor (keini ah Chairman) leh Deputy Mayor (Vice Chairman) ten ro an rel a ni ber mai. A tawpna atan chuan lawmthu sawi ka duh a. Kan zinna senso min tumsaktu Aizawl Municipal Council thuneitu Chairman, Vice Chairman, Executive Councillor, Chief Executive Officer leh thawktute zawng zawng chungah lawmthu ka sawi duh a. Kan zinna tur min buaipuitu leh kawng engkima hnehsawh taka min kaihruaitu Pu Vanlalsawma Khiangte, Executive Officer leh Pu H.Lalruatliana, Superintendent AMC chungah te, Kolkata leh New Delhi a Mizoram House enkawltu, nuam taka min thlengtute, ka zinpui MJA member te chungah te lawmthu ka sawi duh a. Kan zin chhunga damlohna leh thil dang buaina laka min hum tlattu PATHIAN chungah lawm thu ka sawi mawlh mawlh bawk a ni. Tun tum kan zinna ang chi, state dang khawpui inenkawl leh kaihhruai dan atanga kan Aizawl khawpuiin zir tur a neihte tun aia tam zawk kan zir zel theihnan AMC hian hun tha zawk min siamsak leh se ka ti hle a. Tun tum kan zin pawh hi AMC hian engmeawti kawng tala a hlawkpui ngei ka beisei tlat a ni.