Siami leh sawrkar hna

Admin - Aug 29, 2021

Sawrkar hna pek a nihna avang hian a nih tur a nih loh phah ang em?

Tun hnaiah Mizo hmeichhe zinga Olympic khel hmasa ber Lalremsiami chuan Mizoram a rawn lut a, ropui takin hmuah a ni a, partial lockdown te ni lovin nundan phung pangngaia kan khawsak lai te ang phei kha chu ni se,a hmuhna programme kha a ropui leh zual ngei a rinawm. Remsiami hlawhtlinna hi hamthatna nasa takin a umzui a, sawrkar pawhin  hna tha tak a pe a, inhmun a pe bawk.  Mimal leh pawl ang pawhin lawmpuina a dawng hnem he.

Chutihrual chuan mi tam tak ngaihdan a inpersan a, sawrkar hna pek anih chungchangah a tha ti pawl leh tha lo ti pawl an awm a, sawrkar hna pek a nihna avang hian a nih tur a nih loh phah ang tih hlau tam tak an awm.

Remsiami lawmpuina dawn te hi a lawmpuiawm rualin tunhma lamah Mizoram sawrkarin infiammi a chawimawi zingah an nih tur ang ni phak loh phaha ngaih theih an awm avangin hetiang hi a thlen leh an duh tawh lo.  Mizorama a sports assocition pakhat hruaitu chuan, “Remsiami a lawmpui awm a, Mizo hmeichhe zinga Olympic khel hmasaber a nih vang ngawt pawh hian a hna an pek hi a phu. Chutihrualin a inkhelh a nghawng phah hi a hlauhawm. Inkhelh an chawlhsan hnuah heng hna te hi pe se a fuhna chen pawh a awm theiin ka hria,” tiin a sawi. Duty awl thlap se a duhthu leh infiammi pawhin inthlahdah nan hmang lo se a duh thu a sawi lang tel bawk.

Remsiami hna pek chungchang hian sports ziak thin pakhat chuan, Infiammi te sawrkar hna pek chu tha a tih thu a sawi rualin, sawrkar hian an pek tur te tehfung tha tak nei se a duh thu a sawi a. “Khawvel huapa senior levela a medal la tih ang te hian tehna hi nei sa se, a tha ka ti.  Remsiami pawh medal la chiah lo mahse, hmeichhe zinga a hmasaber a nihnaah hi chuan hna pek hi a phu ka ti,” a ti a.  Chutihrualin an infiamna lama hmalam eng tak nei te hi chu hna hi pe nghal mai lo se, sawrkar hian an hmasawn dan leh a hlawhtlin dan atangin incentive lam te hi a khat tawkin pe se tha a tih thu a sawi a. Infiammi hlawhtling hi Mizoram atang chuan an tam theih a rin loh thu pawh ZALEN a hrilh bawk.

Share now