Aizawl March 4, 2025 : Person with Disablities (PwD) Commissioner Vanlaldiki Sailo chuan Sawrkar programme pawimawhah Bengngawng te pawhin an hriatthiam ve theih nan Mizoram-ah pawh Sign Language thiam tawng lettu tur an awm a ngai tawh tih a sawi.

Vawiina World Hearing Day lawmna huna Khuallian Vanlaldiki Sailo chuan Central sawrkar pawhin hei hi hman turin thuchhuah a siam tawh a ti a, Bengngawng te pawhin an hriatna tihzau an mamawh tawh a, chuvangin sawrkar hmalakna te an hriat theihna turin Sign Language thiam, thusawi lo let zung zung thei tur an awm a ngai tawh a ti.

WHO-in a chhut danin tunah hian khawvela mi maktaduai 466 zet beng ri hriatna lama harsatna neiin an nitin hnathawna leh eizawna kawngah harsatna an tawk mek a, kum 2050-ah phei chuan mi maktaduai 900 tling tura chhut a ni. Hetiang a nih avang hian Sign Language hi a pawimawh zual zel dawn niin a sawi bawk.