ZALEN Dec. 11. 2024; AMC in la thla tura a hriattir angin, kawngpui dunga signboard intar, 'Tumhara Naam Kya Hai' chu lak thlak a ni deuh vek tawh.

Aizawl Municipal Corporation (AMC) chuan Aizawl kawtther hmun hrang hranga, phalna nei loa 'TUMHARA NAM KYA HAI?' tih poster intar chu December 8, 2024 (Pathianni) khan a tartu chhuichhuakin, Black Tiger Cement brand fakna atana M/s Goldstone Cements Limited hmalakna a ni tih a hria. December 9, 2024 (Thawhtanni) chawhma lam khan Goldstone Cements Ltd. Manager, Chanmari, Aizawl hnenah hriattirna pein, phalna nei loa poster tarte hi thupek chhuah ni zan dar 1 rik hmaa thianfai vek tur leh, an hmalaknate rang taka AMC a thehlut nghal turin thu a pe a ni.