Aizawl March 20, 2024 : Kawnpui Joint-in Vaivakawn hneh nawnin goal thum goal khatin Thawhlehni zanah an chak a, si belh khawmah goal nga goal khatin Mahindra XUV3OO LPS Cup final an lut.

Si hnih faia hmahruai sa chungin semifinal second leg-ah Kawnpui an inlan a, Rajiv Gandhi Stadium, Mualpui-ah rei an inkhelh hmain Lalkrossmawia'n penalty chhuih lutin hma an hruaina a tipung.

Darkar khat an inkhelh hnuah Kawnpui goalkeeper Lalhruaitluanga hnawhchhuah a ni a, player 10 an nih hnuah Mawitea'n pet lut lehin tournament kal meka goal sarih a thunna a ni a, khung tam ber a ni nghal a ni.

Emmanuel Ramengmawia goal hmangin Vaivakawnin beiseina chhe te an neih hnuah Albert Zohmingmawia'n Kawnpui tan thun ve lehin player pakhata tlem zawk ni chungin inkhel an thunun thei a, hun pangngai tawp nan minute ruk a la awm tihin Vaivakawn forward Moody Lalawmpuia'n red card a chawi ve leh a, player 10 ve vein hun tawp an hmang a ni.

Minute 180 an inkhelh chhungin Aizawl district pawn atanga sawm bik Kawnpui an chungnung a, zirtawpni zan final-ah anni ang bawka semifinal thununa goal nga goal hniha Bethlehem Vengthlang hnehtu Sihphir Venghlun nen champion nih an inchuh dawn a, hremna vangin goalkeeper rinrawl Hruaia an hmang thei dawn lo a ni.

Vaivakawnin final lut turin goal khung hma an mamawh laiin Ramdinzauva'n Albert-a pawt tluin penalty a chawi a, minute ngaah Kawnpui striker Mawitea'n chiang takin a pet lut a ni.

H Lallianmawia'n Aizawl pawn team tan a thun belh teuh hle a, ball khalh falin keeper Lalhruaizela chiah a awm tawh tihin goal pawn chiahah a pet chhuak a. First half tawp lamah Vaivakawnin corner petin Hruaia'n nam chhuak mah se penalty box pawn atangin R Vanlalruatpuia'n a pet zui nghal a, goal hma atangin Jehova Lalthangsanga'n a dang chhuak a ni.

First leg nen belh khawma si thum faia hma an hruai laiin goal veng Hruaia a talbuai a, Benjamin Lalnunpuia lakah kut a thawh vangin minute 54-ah hnawhchhuah a ni.

Tlem zawk an nih hnuah pawh Kawnpuiin an nawr hneh a, minute 62-ah Mawitea'n defender pakhat a tlan pelh hnuah petin Hruaizela'n a dansak a, a hnu lawkah Lalengmawia'n freekick petin an dang kawi a, Mawitea'n tha takin a chhuih lut zui nghal a, an inkhelh hmasak khan goal thun lovin hun hmang tluan mah se an intawn nawn lehnaah danglamna siamin an dang hneh lo.

Vaivakawnin an thah rualin an vawrh lut nghal a, substitute goalkeeper Lalnuntluanga Ralte chuan ball man nghet thei lovin a thlauh a, Emmanuel-an pet lutin team tan beiseina thar siamsak mah se, minute 76-an Engmawia'n ding lam kil atanga freekick a pet chu goal ban hla lam atangin Divya player of the match Albert-an a tauh lut a, lehlam beiseina a tihtawp bakah, minute 84-ah Vaivakawn chet chhiat tizualin Moody-an a vawi hnih nan yellow card a chawi a ni.

MAHINDRA XUV 300 LPS CUP 2024

Tuesday 19, March 2024

Rajiv Gandhi Stadium, Mualpui

Semi Final 2 (2nd Leg)

VAIVAKAWN LC 1-3 KAWNPUI JT. VC

⚽VVK : Emmanuel Ramengmawia 64'

⚽KP : Lalkrossmawia 5' (P) 63' Albert Zohmingmawia 76'

RED CARD : Lalhruaitluanga (Kawnpui, goalkeeper) 54', Moody Lalawmpuia (Vaivkawn) 84'

Divya player of the match : Albert Zohmingmawia (J. No 11, Kawnpui Jt VC)

Kawnpui Jt VC won 5-1 on aggregrate

MAHINDRA XUV 300 LPS CUP 2024

Best Player Nominee

Joseph Lalthafela (Sihphir Venghlun VC, Jersey No. 17)

Joseph Lalrinawma (Kawnpui Jt VC, Jersey No. 7)

Lalrammawia (Bethlehem Vengthlang LC, Jersey No 19)

Benjamin Lalnunpuia (Vaivakawn LC, Jersey No. 7)

Top Scorer's (Before Final)

1. Lalkrossmawia (Kawnpui Jt VC, Jersey No 9), 7 goals

2. Ricky Lalramnghaka (Sihphir Venghlun VC, Jersey No 21), 6 goals

3. Benjamin Lalnunpuia (Vaivakawn LC, Jersey No 7), 5 goals