- Chhingdailova Kan ram hruaitu te, Cabinet Minister te chuan sikul kai hun sawn hma tur thu an titlu ta rup mai a. Mi tam tak chuan sikul kai hun sawn hma hi kan thatpui an ring viau a. Mahse, khawnge sikul tan hma that tawk lohna nia ka hriat mawl tete-in ka’n lipse ve dawn teh ang. Sum leh pai a khawih dawn: Sikul tan hma chuan chhunchaw ei hun a hma ngei a ngai ang a. Chhunchaw an ei hma chuan zanriah ban hman lo tam tak te, an sikul bâna an riltam inhnangfakna tur ei leh ina sum sen tur ngawt pawh hi thil tam tham a ni. An riltam hma avangin zanriah chaw ei hmapui ngawt dawn se la, office lam timing a tawlh ve si lo va, a ei hmapui ngawt theih dawn loh a ni. Tin, thingtlang lama feh an haw hma ve ngawt a rem dawn si lo va. Naupang riltam inhnangfakna turah pawisa tam tak a luanral a ngai dawn a ni. Hunawl hman that loh kan zir ang: Sikul an bân hma chuan hun awl an ngah dawn thung a ni. Mi tam tak chuan, “An sikul bânah thil tangkai an zir thei ang a” te an ti a. Aizawlah pawh hian sikul bâna fate tuition leh an tuina zirtir thei hi chu mi tlemte chauh an ni. Heng an hun awl neihah te hian naupangten thil tangkai ni lo, thil tangkai lo tam tak an zir chhuah phah a hlauhawm. Thingtlang thil zir tur nei ve lo, zirna pawh awm hlei lovah phei chuan sikul an bân hma chuan tih tur nei hek lo, dai hnaiah an vak rawlai ang a, sava veha chhuakin kan nungchaten an tuar leh dawn a nih hmel. Aizawlah pawh tlai len leh thiante in vela tei mai mai an pun phah dawn a nih hmel. Tunah pawh hian a dik tak chuan sikul kal hun pangngaia an exam chawlh te, thlasik leh nipui chawlha hunawl hmang tha lo, an nu leh paten an buaipui, sikul lut leh vat vat se an tih hi an awm nual reng a ni. Kan zing kar life hi ka ui: Mi tam tak chuan in vairam nen kan ram hi kan tehkhin fo thin. Mahse, hei hi kan hriat reng a tul awm e. Vaiho hlawhtlinpui hi kan hlawhchhampui tamzia en hian vaiho tih dan a dik a dawk pawh thlu hlei lova lak ve ngawt hi thil tih chi a ni ber lem lo. Vai ramah chuan an tho hlawt a, breakfast an ei a, office kal tura insiam a ngai a. Sikul naupang phei chu thlasik lai phei chuan khawvar hmaa sikul tura kal chhuah a ngai hial a ni. Anni chuan zingkar life an nei ve lo. Mizote hi zingkar life nei hnam, zing kar hmang tangkai em em hnam kan ni a. Zing kar hnatlang te, committee, leh inhmuhkhawm leh zing len chhuah ching hnam kan ni a. Chu chu kan khawtlang inawp dan leh kohhran thil tihah pawh thil tangkai tak a ni reng a ni. Tuna sikul tan hma kan tih hian kan zing kar life hi a bo zo dawn a ni. Zing karah engmah kan ti hman lo ang a. Tun din hmuna dar 9/9:30-a sikul tan tur hian zing dar 7:30 atanga dar 8-a chaw kan ei lai hian zing dar 8 kan tan chuan zing dar 6:30-ah chaw kan ei a ngai tawh dawn a ni. Chu chuan kan nung phunga pawimawh tak, zing kar life chu a um bo tawh mai dawn a ni. Pa ber office kal tur tan chuan chaw ei kham a thut muan paha thingpui sen hâng han dawm pah a rem rualin an rilru luahtu ber an fate/naupangte nunphung vangin kan Mizo society-a thil pawimawh tak chu kan um liam ang a. Tlai office ban hun an sawn ve loh avangin zing kara kan tih hman loh chu tlaiah kan ti hman leh chuang dawn lo a ni. Thil uiawm taka a va ni em! Aizawl chauh hi em ni Mizoram?: A dik tak chuan thingtlang lama awmte hian, “Aizawl chauh hi emaw Mizoram in ti thin,” tiin an sawi thin a. Hei hi a dik nachen pawh a awm viau awm e. Sikul tan hma lo chhuahna an sawi chu office hun laia motor tawt lutuk vang hi a ni ber awm a. Office-a kal te ai hian sikul naupang kan tam zawk a. Office-a kal thin chhungkua aiin Mizoramah hian a kal lo chhungkua kan tam zawk bawk a ni. Chutiangten, a bikin Aizawla traffic tawt avanga Zoram pum office pakhat pawh awm lohna, sorkar in leh lo chu sikul chauh awmna thlenga kan her danglamsak hi chu a pawi tak zet a ni. A bikin sikul tan hma vanga awlsamna kan neih tur hi mipui za zel 30 pawh an ni pha lo va. Aizawlah pawh traffic tibuai lova lam hnaia sikul kal hi a tam zawk an ni bawk a ni. Khawpui danga sikul kal hun laia traffic buai hi buaipui tham a nih hmel bawk si lo va. Tun hnai sikul kai hma kan tih hian in Aizawl chauh hi em ni Mizoram in tih an ti leh ngei a rinawm. Hmeichhiate an bet nawn leh dawn a ni: Tun hma lam chuan Mizo hmeichhiate dinhmun kha a hrehawm em em a. Zingah buh den leh tui chawi a ngai a. Khaw en hmain chung thilte chu an tih a ngai thin. Tun hnuah buh den leh zing tui chawi a ngai ta lo va, Mizo hmeichhia dinhmun pawh an ziaawm tawh tak zet a ni. Amaherawhchu, sikul tan hma kan tih hian in lama ei rawngbawltu kan Mizo hmeichhiate an dinhmun a hrehawm thar leh dawn a ni. Zing takah thawh a, ei rawngbawl a ngai leh dawn a. Kan Indian Standard Time pangngai (kan awmna atanga darkar chanve chuang a tlai) kan la rin miau avang hian thlasikah phei chuan khaw en hmain nu a thawh a, sikul kai hla deuh phei chu khaw en hmaa chaw eipui a ngai ngei dawn a ni. Sikul tan hma hian kan Mizo dinhmun a hnuk hniam nawn leh dawn a ni.