Assam-a Silchar Medical College & Hospital (SMCH)-ah tun laia India ram hmun hrang hranga a kai an hmuh chhuah, black fungus kai hmuh chhuah a ni a. Ani hi a hmaa COVID-19 lo kai tawh a ni.

SMCH-a doctor-te chuan a biopsy an endikna report atangin black fungus a kai tih an finfiah tih Zirtawpni zan khan an sawi.

SMCH Vice Principal Dr Bhaskar Gupta chuan damlo hi Karimganj district-a mi a nih thu leh medicine ward-ah an enkawl thu a sawi.

A dinhmun a tha rih tih sawiin hlauhawm loh a nih em tih erawh sawi mai a harsa niin Dr Gupta chuan a sawi a. “Ngun takin kan vil a, sorkarin enkawl dan tur a tih angin kan enkawl,” a ti.

SMCH Principal Dr Babul Bezbaruah chuan an damlo enkawl hi May 5 khan Karimganj Civil Hospital-ah COVID-19 a kai tih finfiah a ni a, May 11-ah enkawl dama chhuahtir a nih thu a sawi.

Thawk lamah harsatna a neih zui tak avangin Silchar damdawi inah hian May 12 khan dah luh a ni tih a sawi.