Sipai kalrem lâmah pheikhawk sang!

Admin - Jul 11, 2021

Sorkara mi pawimawhte pawhin an sawisel nasa

Ukrainian defense minister chu a hmeichhe sipaiten kalrem lâm (parade) pawimawh takah pheikhawk sang (pumps with heels) an bun dawn tih sawi a awm avangin sawisel a tawh phah nasa hle a. Sorkara mi pawimawhte pawhin an sawisel nasa hle.

“Sipai kalrem lâm chu eng pawh ni sela sipaiten an nihna ang an lantirna tur a ni a. Hetiang thil leh mipat hmeichhiatna lam thil hawi engmah a awm tur a ni lo,” tiin cabinet member pathumten thuchhuah intawm an siamah an tar lang a. Thuchhuahtu zingah hian Veterans Affairs Minister Yulia Laputina pawh a tel.

August 24 khi Soviet atanga Ukraine a indan champha kum 30-na a ni a, hemi puala sipaiten kalrem lâm an entir turah hian hmeichhiate hi pheikhawk sang nen an che chhuak dawn tih puan a nih atangin hetianga duh lohna hi a ri chhuak nghal a ni.

Cabinet minister pathumten thuchhuah intawm an siamah hian an rama hmeichhe sipai 57,000 chuang awm mekte chuan ‘an hlutna chu pheikhawk sang hmanga tehsak tur ni lovin, machine gun hmang zawka teh tur a ni’ an ti a ni.

Defense Minister Andriy Taran chuan sipai hmeichhiaten kalrem lâmah pheikhawk sang an bun tur chungchang hi en fel turin thuneitute chu a hriattir tawh a. Enchhinna atan ankle boot an tih zawk chu an bun dawn a, pheikhawk sang chu an bun dawn ta lo niin news agency-ten an tar lang.

Sipaite chuan an hmeichhiaten mipa anga pheikhawk inang tlang bun lova an duhthlan ang an bun theih chhan erawh engmah an sawi lo.

Share now