Sipai lalin Suu Kyi-i hriselna a tha a ti

Admin - May 22, 2021

Sipaiten mipui rorelna paih thlaa Suu Kyi-i an hren hnua a interview hmasak bera a chanchin hi a sawi

Myanmar sipai hotu chuan Aung San Suu Kyi-i chu a hriselna a tha niin a sawi.

Min Aung Hlaing hi February thlaa a kaihhruai sipaiten mipui rorelna paih thlaa Suu Kyi-i an hren hnua a interview hmasak bera a chanchin hi a sawi.

Suu Kyi-i hi ni reilote hnuah court-ah a inlan dawn tih sipai hotupa hian a sawi bawk.

Sipaite hian sorkar an paih thlak hnuah Suu Kyi-i hi a chenna inah an hreng a, vantlang zingah hmuh tur a awm zui lo.

An kawmnaah hian Min Aung Hlaing hian a finfiahna awm chuang si lovin November, 2020 inthlan thil tihchingpen a awm tih chu a sawi nawn leh a. Hei hi sipaiten sorkar an paih thlak chhan pawh kha a ni.

Inthlanah hian Suu Kyi-i kaihhruai, National League for Democracy (NLD) party hian hnehna an chang a; mahse, sipaite hian February 1-ah sorkar paih thlain thuneihna an chang zui.

Sipai an sorkar hnuah hian mipuite chuan anmahni duh lohna lantirin mi 4,000 chuang an man an ni tawh a. Assistance Association for Political Prisoners (AAPP) chuan mi 800 chuang thah an ni tawh niin a sawi bawk.

Min Aung Hlaing-a hi Hong Kong-a Phoenix Television chuan Ningani khan an kawm a, a interview-na kimchang erawh pek chhuah a ni lo thung.

General hian Burmese-in a sawi a, Chinese-a lehna video chu social media-ah thehdarh a ni thung.

Share now