Aizawl: India leh Myanmar ramri, Myanmar ram chhungah sipaite leh Arakan Army te an inkah avangin Myanmar mi engemaw zat Mizoramah an rawn lut leh.

Lawngtlai atanga thudawn danin Lawngtlai District, Laitlang piah, Myanmar ram chhunga Myanmar sipai leh Arakan Army te inkahna vangin Lawngtlai District ah an sahimna zawngin mi 553 an rawn lut tawh a, heng raltlan lolut te hi Zochachhuah ah 101, Hmawngbuchhuah ah 200, Laitlang ah 172 leh Dumzautlang ah 80 te an awm niin Police ten an chhinchhiah a. report dangah chuan raltlan lo lut hi 564 an tling tawh niin an sawi.

Myanmar ramchhung, Varang chhehvel ah hian Myanmar sipai leh Arakan army te an inkap zeuh zeuh reng a, Myanmar sipai chuan thlawhna an hmang  a. Varang leh a chhehvel a mipui ten an sahimna zawngin Ningani atang khan Laitlang leh a chhehvel khuaah te an tlan lut a ni. Central Young Lai Association chuan an Treasurer R. Rampana hovin Relief Team te ramri ah hian a tir a, raltlan te ei tur leh mamawhte an pe a ni.