ZALEN September 4, 2026 : SIR 2026 Final Electoral Rolls Thawhtanni (07.09.2026) a tlangzarh tur chungchang leh SIR 2026 kalpui dan thlirletna chu vawiin khan DC Pisa Pui Hall-ah District Election officer leh district bawrhsap ni bawk Er. Lalhriatpuia kaihhruaina hnuaiah neih a ni a, SIR Official te leh Recognized political party, CYMA, MUP leh MHIP te an tel.

Meeting-ah hian Tlawmngai pawl leh Political party aiawhte chuan mutmu pawh tuah lova, SIR 2026 Final Electoral Rolls felfai leh thianghlim, hun tiam chhunga tlangzarh a ni theih nana thawktu, DEO leh ERO, AERO, BLO leh BLA te chungah lawmthu an sawi a. Tlawmngai pawl te leh Local council/Village council te pawn theihtawpa SIR 2026 official te an lo puibawm theih avangin lawmawm an tih thu an tarlang a. SIR 2026 Final Electoral Rolls tlangzarh turah hian sawisel tur an neih loh thu leh SIR 2026 official ten tha taka an hna an hlen avanga an lawmpui thu an sawi.

Political party aiawh te chuan SIR 2026 hi Mizoram hmalam hun atana thil pawimawh a nih tih hria a, lungrual taka party zawng zawngin SIR 2026 official te an puibawm thin chu thil lawmawm tak leh chhinchhiah tlak tak a nih thu an sawi bawk.

DEO Er. Lalhriatpuia chu Aizawl District hi Mizoram District dang te aiin Population sangin, Assembly constituency pawh tam zawk deih mah se, DDEO, EO, ERO, AERO, BLO leh BLA te thawhrimna leh inpekna zarah a hun taka Final Electoral Rolls an tlangzarh theih tur hi lawmawm ka tih thu a sawi a. He thil hi Tlawmngai pawl leh Local Council/Village council te bakah MJA te puibawmna zarah liau liau a ni, tih a sawi a, an chungah DEO a nihna angin lawmthu a sawi.