DOWNLOAD OUR APP

Read latest news on your phone
app-store

SMB Missionary leh Tutor an thi

Feb 15, 2014

SMB Missionary leh Tutor an thi

Meghalaya-ah Truck-in Sumo tai; SMB Missionary leh Tutor an thi Aizawl; Nimin zing dar 6 vel khan Aizawl - Guwahati Maxi Cab Service (MZ 01 J- 4053) chu Ladrymbai thlen hma Khleihriat-ah truck-in a su a, Medal Lalengzuali (32) w/o C Lalrokima, Chhinga venga khawsa, Synod Mission Board hnuaia Missionary hnathawk mek chu a hmunah a thi nghal a, a ni bakah hian Lalhmunsangi (32) d/o Laltanpuia, North Vanlaiphai khawchhuak, tuna Chanmari, Aizawla khawsa chu damdawi in thlenpui a nih hnu-ah a boral leh bawk. He Maxi Cab hi Aizawl - Guwahati service a ni a, Zirtawpni kalta zan khan Aizawl atangin Guwahati an pan a, driver nen mi 10 chuangin, nimin zing dar 6 vel khan Ladrymbai thlen hma, Khleihriat-a an tlan laiin anmahni tawk zawnga tlan Truck-in driver side lamah na takin a tai a, driver seat hnung chiaha thu Synod Mission Boad hnuai Hamren, Karbi Anglong Mission Field-a Evangelist Teacher hnathawk, Medal Lalengzuali leh a hnung chiaha thu, Apollo School of Nursing-a Tutor hnathawk mek, B Sc. Nursing, Neigrihm-a hna dil exam pe tura kal Lalhmunsangi pawhin hliam na tak a tuar a, damdawi in hnai ber, Khleihriat damdawi in thlenpui a nih hnu-ah a boral a ni. Medal Lalengzuali (32) Evangelist Teacher, Hamren, Karbi Anglong Field-a thawk mek hi a pasal C Lalrokima nen hian Synod Mission Board hnuaia thawk mek an ni a. Motor lian nen an chuanna sumo hi an intlanpela, motor lian hnunglamin a hnung chiaha thu Lal-hmunsangi nen hian na takin a hem a ni. Thi te hi Khlehriat damdawi inah lak an ni a, postmortem tih zawh an nih hnu-ah Mizoram panpui nghal an ni. Maxi Cab-a chuang midang te chuan vanneih-thlak takin hliam an tuar lo a, anmahni su tu Truck driver hi a tlan bo nghal a, he thu buatsaih lai thleng hian an man awm hriat a la ni lo.
Share now