DOWNLOAD OUR APP

Read latest news on your phone
app-store
SMS AVANGA FIR THEHLUHIN A NGHAWNG THEIHTE
Mar 22, 2014

Tun hnaia social network facebook leh chanchinbu-ah te  K.V. Multipurpose School, Durtlang neitu Pu Chhawnthuama fapa inti Vanlalruata’n Chief Minister Pu Lal Thanhawla’n TV-a a interview  thusawi avanga thinrimin, “Ka nu thlan hmang hian ei kan zawng lo va. PATHIAN hian keini mi ­­sual ei tur chu min pe ve. Tin, ngaihdam dil tur hian vawi khat mah ka la kal lo. I rui luhai vang a ni ang. Tun atanga reilo teah hian Zarkawt kawnah khuan hruizenin ka hling kual che ang a, ka chaih kual dawn che,” tia a vau chu advocate pahnih Pu S.L.Thansanga, leh  Pu L.R.Tluanga leh Pu V.Z.Kaia, te hmingin FIR thehluh a ni a a. Hemi hma hian  Pu Hawla chu  vote thlakna  khawl  EVM suasam  avanga tlingah puhin  heihi  thlalak nen lama puanzar a nih tur leh a suasamtuho pawh an nun a risky-ziate tihthaihna leh vauna a dawn avangin  Pu Hawla hian SMS thawntua puh Pu K. Chhawnthuama lakah FIR a thehlut a,  Charge sheet pawh siam a ni tawh a. Hetianga Chief Minister leh Kohran Upa meuh  inchaltauh ta chu thil dik tak hai lanna atana Remruattu in a ruat  a ni mahna le ! SMS, Seal lem leh FIR thehluh avangin  kan mi pawimawh leh langsarte hming chanchinbuah a  lang ta fo mai a, chutih rual chuan inchhuah mualpho chu duhtawkin FIR  chu withdraw leh a nih thu kan hre fo mai. FIR hi thil dik lo, a dik lohna hriat chhuah vat duhna avanga Police hnena chhuichiang tura thlen a nih avangin a a karah thil dik lo a inzeh hman lohna turin  a rang thei anga Charge Sheet  siam  tura beisei a ni. Kum 2011 khan MHIP  Hqrs Ex Committeein Pi Lalbiakengi chu a nihna an hlihsak avangin  MHIP chu dim lek lovin Court-ah a khin tak zen avangin Committee-in a rel angin dt 17.9.2011-ah Biakengi lakah FIR a thehlut ta a. Mahsela, he FIR hi kum khat leh a chanve  hnu zet MHIP  Gen Assembly (25th April, 2013 ) hma ni 3 chiah awmah ngaihtuah  a ni a. a tukah Result puan a ni ta a. FIR-ah hian Pi Biakengi’n thiam a chang ta tlat mai a. Ani lahin a lawmna ruaite a siam tak vang kha nge  ‘MHIP -in Biakengi an hneh lo’  tih thawm  thang vel chuan MHIP Hqrs hruaitute a titlawmngai ta a. Biakengi FIR-a a thiamna chhan thudik tak an hriat leh  document pawh an neih thlap  chu  intihbuai an nin avang leh Biakengin MHIP a khinna  Court case 3 a withdraw bawk avangin  ngawih bopui mai an tum a. Mahsela Biakengin a chak a lawm tak vak avangin  an MHIP  member-pui leh tul an tihte chauh SMS hmangin  an lo inhrilh darh ta niin an sawi a. Chu SMS chu ‘thu dik lo’ tiin Pi Biakengi chuan an President Pi B.Sankhumi lakah dt 7.6.2013- khan FIR a thehlut a. Chanchinbu hrang hrang leh LPS, ZONET leh Doordarshan-ah te ‘Thu dik lo thehdarh tu’tiin mualpho taka chhuah a nih hnuah he  FIR hi Pi Biakengi hian  dt 27.7.2013-ah a sut (withdraw) leh ta  a ni. Thilmak tak chu SMS-ah hian eng thu nge awm tih khawiah mah ziak leh sawilan  a awm lo va , tumahin an zawt hek lo. He SMS-a thu ziak chu heihi ani. “MHIP Hqrs. Exe.Committee-in Biakengi laka FIR a thehluhah Biakengin thiam a channa chhan chu FIR thehluh chhan pawisa chingpente Supply Order hmanga rulhsak vek a nih bakah a SEAL LEM siam 72 leh a thiltih dik lo thailanna te a bo vek avang a ni. FIR hi Court case ni lovin Police Case a ni. Biakengin MHIP Hqrs Exe. Committee a khinna Court Case pathum chu Gen Assembly hma ni lawkah a withdraw vek a, chuvangin  MHIP chu THIAMCHANGTU zawk a ni. Mahni Case withdraw-tuin chakah a inpuang a nih hi! Kum 2013 April khan Tuivawl bialtu Pu RL Pianmawia MLA chuan ama MLA Fund atanga  Step siamna tur cheng nuaikhat chu N.Serzawl VCP seal leh signature lem hmangin a la chhuak a. Chuvangin VCP leh Vice President te chuan April 17, 2013-ah  Pu Pianmawia lakah FIR  an thehlut a. MLA hian  gaihdam a dil avangin FIR hi  sut (withdraw) a ni leh ta a. Hemi hnulawk hian Pu Pianmawia vek hi Khawpuar Biakin lungremna tura a pek cheng nuaikhat chu MUP seal  leh hming  dik lo  hmanga lachhuakah puhna  chan chinbuah a lo lang leh a,. FIR  erawh sawirik a awm lo. Hei hi inpuh hmingchhiat tumna mai nge a tak tak tih hriat a ni lo. Mizote hi Dan leh Hrai hriatna lamah kan la pachhe hle niin a lang. Miin FIR an thehlut chuan engamah hmaa FIR thehluttu hi a thiam zawk  tura ngaihna a awm ringawt thin. FIR thehluh hi tunlai kan rama thil lar ber pakhat a ni a, miin FIR a thehluth chuan  Police-in an lo chhuichiang ang a, an chhuina  Report  chu Court-ah  thehlutin  Court chuan thu dik hai lan a lo tum dawn a ni. FIR hi chu step hmasa chauh a ni tih hi kan hriatchian a pawimawh hle a ni. FIR thehluttu hi dik zawk tura kan ngaihna hian thawka phita FIR thehlut a, chanchinbua inchhuah mualpho hnua withdraw leh mai maite a hring a, chuvangin FIR hi  INTIHMUALPHO nan leh SUMDAWNNA atana hman theihah kan siam  mai ang tih a hlauhawm ta hle a ni. — Lalthazuala Tlau Bethlehem VY

MSSSB thiah leh thiah loh
Mizoram Subordinate Services Selection Board thiah tum hi eng nge i ngaihdan?
Thiah tha ka ti
Thiah kher tul ka ti lo
Ka hrethiam lo

Latest News & Chhiar Hlawh