ZALEN September 29, 2026: Activist hriat hlawh Sonam Wangchuk, Engineer leh Educator ni bawk chuan Delhi-a cham mek MNF President Zoramthanga chu appointment a dil angin nimin khan Mizoram House, New Delhi ah a kawm.

Wangchuk chuan, "Mizoram neih ang Memorandum of Settlement hlawhtling tak hi zirchian ka duh a; Mizo Peace Accord - Inremna hlawhtling neih kawnga sulsutu Zoramthanga tawnhriatte hriat chian lehzual a, kawm hi ka duh a ni," tiin a kawm duh chhan a sawi.

Zoramthanga leh Sonam Wangchuk inkawmnaah hian politics leh tunlai khawvel chungchang an sawi tam ber a. Wangchuk hian Mizoram leh India inremna chu ropui a tih avangin zirchian ve a duh thu a sawi a. MNF President pawhin lawm taka lo dawngsawngin, he Peace Accord hi inremna tlo leh tluantling, hlawhtling ber a nih avangin mimal leh ram dangte pawhin zir thamah ngaiin an rawn zir fo tawh tih a lo hrilh a. Sonam Wangchuk pawhin zir belh leh zirchian zel a duh a, amah leh Ladakh lama a ṭhiante nen Mizoramah emaw, a remchan dan anga inkawm a, zirchian lehzual a duh thu a sawi.

MNF President chuan he inremna atana India sawrkar patlinzia sawi langin, " Pu Laldenga, electoral roll-a chuanglo kha India sawrkarin Interim Agreement-ah ṭul an tih avangin Indian Constitution ang thlapa thlan tlin Mizoram UT Chief Minister Pu Lal Thanhawla pawh an lan-tir duh a. Hei hian India sawrkarin remna a duhzia leh remna atan a man pek an inhuamzauzia a lantir a ni," a ti. He inremna tlo leh entawntlak ber pakhat neitu Mizoram mipuite neih ang inremna hi nei ve zel sela an duh thu Sonam Wangchuk hi a lo hrilh bawk.

Wangchuk chuan Zoramthanga chu fakin, ramhnuaiah kum 20 MNF underground movement-a awm tawh, kum 15 zet Chief Minister ni zui ta bawk leh, chawl miah lova kum 36 chhung MNF President-ah a ṭang thei chu mak a tiin a fak a. Hun remchang la siamsak leh tur leh, Memorandum of Settlement zirchiang tura Mizorama lo zin a duh thu Sonam Wangchuk hian a sawi bakah, MNF President Zoramthanga pawh Ladakh-ah zin ve ngei turin a sawm bawk.

He inkawmnaah hian Mizoram House Kitchen siam Mizo chhangban kan leh Mizo thingpui nen Zoramthanga, MNF President leh Chief Minister hlui ni bawk hian Sonam Wangchuk hi a lo hlui a. A lehkhabu ziah 'From Guerilla Fighter to Chief Minister' leh, Memorandum of Settlement original scanned copy chu a hlan nghal bawk.