Electronic bungraw siam chhuaktu lian SONY chuan YouTuber leh content creator te tana duan bik Sony ZV-E10 mirrorless camera an siam chhuak thar rup mai. 

He camera hi lek awlsam leh khawih nuam tak tura duan niin, hman an intihmuh chho a nih pawhin a mak lo ang. Sony ZV-E10 hi North America lamah chuan tlangzarh a lo ni tawh a, India ramah pawh lei tur a awm thuai beisei a ni. 

Vlogger te hman tur bik liau liau a duan niin, computer, laptop leh thil dangte nena thlun zawma awlsam taka livestreaming tih theihna tur a ni. A screen pawh a rotate theih a, a body a len loh bawk avangin hman nuam tur tak a ni. 

Sony ZV-E10 hi Alpha series zinga interchangeable lens vlog camera hmasa ber niin, 25-megapixel Exmor CMOS sensor a ni a, video hi 4K a ni cheu bawk. A man hi India-ah chuan Rs. 52,000 vel ni tura ngaih a ni a, rawng chi hnih - a dum leh a varte duhthlan tur a awm a ni. 

Auto-Focus (AF) leh Direct Manual Focus (DMF) a awm a, memory card pahnih a hman bawk avangin a record theih chhung a rei thei leh zual dawn a ni. Slow-motionatana hman tur S&Q mode a chhawm bawk a, hei hi a tak aiin a let li laiin a muang thei zawk a ni. 

Sony ZV-E10 hi a ISO range (100 - 32,000) a tha rem rem hle bawk a, thlalak nan bik chuan 50 - 51,200 ah a tihdanglam theih bawk. White balance mode a awm bakah - auto, daylight, shade, cloudy, incandescent leh fluorescent te a awm sa bawk. 
YouTuber leh content creator zingah thlalak leh video fiah fel fai tak chhawpchhuak duh tan chuan hman ngei chi a ni ang. SONY hi camera siam chhuah kawngah chuan rintlak leh belchian dawl berte zinga mi an ni a, video bikah phei chuan fak an hlawh hle.