H.Lalhmachhuana
Zobawm In

Khawvel changkang zelin a ken tel thil chi hrang hrang, mihring nunphung leh khawsak dan tidanglama tibawrhbang thei an awm belh ve zel a. Thil thar leh boruak dang daih thlen thei thilten mi tam tak nun a herh-khawlo tam ta hle mai a. Keini Mizo te, hnam ze tha tak nei, rinawmna, taimakna leh tlawmngaihna vawng nung tha tak thin chu khawvel boruak thar zelin min han chiahpiah ve chuan, rualawhna leh khawvel thila nuam zawk leh changkang zawk nia kan hriatna lamah (a bikin thalaite) kan tlan nasa ta em em a. Hei hian hnam tluchhe mekah leh hmingchhe tak dinhmunah min din tir ta a tih theih hial mai.    

India ram lian takah state te ber zing a mi leh ram kilkhawr bera awm ni mah ila, ram (India) pum huapa HIV/Aids vei tamna ber, cancer vei tam ber zinga mi, Kristian rama inchhal si kan ni ta reng mai. Zirchiangtu te’n an hmuhchhuah dan chuan nitin HIV/Aids vei belh mi 7-9 awm zel ang kan niin an sawi hial a, mi 50 zelah HIV vei pakhat awmzel ang kan ni tiin an sawi bawk. He dinhmun chhia leh zahthlak em em maia ding kan nih vang hian sawrkar lu pawh a hai ta map ni ber in a lang a, kohhran hruaitute leh NGO hruaitute tan pawh buaipui tak tak tham a tling ta tak meuh a ni. He hri tha lo em em, inkaichhawn awl em em si atanga kan inven (control) hle loh chuan Mizote chu HNAM RAL mai thei dinhmunah kan ding thuai dawn a tih theih hial awm e. India ram mipui pun dan tlangpui (population explosion) chu kumtin 100 ah 15 emaw 18 belh zelin chhut a ni thin a. HIV/Aids ang chi erawh thlah dul chuan hetiang rate aia sang daih, 100-ah 50/100 leh a aia tam daih pawh a ni thei ngei dawn si a. 

Engtin nge kan tih tak ang? Sawrkar tan pawh a luhaithlak a ni. Kristian ram a inchhal tan phei chuan thil zahthlak tak, hnam dangten min hmuhsit phahna tur a ni hial a, a!! kan Pathian lakah pawh kan bawhchhiatna hi zep chi a ni ta lova, Nehemia pawhin Jerusalem a kulh te a chhiat vek thu a hriat khan, “Kei leh ka pa chhungte chu kan lo sual ta si a,” a tih anga Pathian hmaa thupha chawi phawt kan hun ta hle pawh a ni mahna!!

BEIHPUI  THLAK A TUL A NI: He kan tunlai dinhmun chhe ta em em mai, a bikin HIV/Aids darh nasa lutuk hi ngawih bopui chi a ni hauh lova, kan sawrkar hotute chuan ralpui beih a beih tul tih hria in Kohhrante leh NGO te nena tangtlanga beih ho chi ni in a hria a. Dr. R.Lalthangliana, Minister chak tak leh mi thahnemngai  thin tak chuan Kohhran hruaitute leh NGO hruaitute chu AIDS buaipuitu MSACS hruaitute nen uluk takin inrawn khawmna a neihpui tawh a ni a. |hahnemngai leh fimkhur takin kan sawrkar leh NGO hruaitute chuan hma lak dan kawng an zawh ngei turah ngai ila. Beihpui thlak a tul a ni.

Sawrkar chu mipui hamthatna buaipui tur a nih avangin a veitute leh a buaipuitu a nih chu a dik hle ang a; chutiang bawkin Kohhran leh NGO (YMA) te hlei hlei tan hian enghelh a tul em emna a awm a, chu chu, Kristian ram mite kan nih angin kan Bible sawi dan chuan Pathian dan leh thupek te kan zawm loh chuan hri thalo tinreng kan zingah Pathianin  rawn thlen tirin, kan boral hma loh chuan, mi tlemte chauh kan nih thleng pawhin kan chungah a lentir tur thu a sawi a (Deu 28:58-63, etc). Kan Pathian hi hmangaih Pathian ni reng chungin a mite (a hnam thlante) chungah chuan a thikthu a chhe em em tho si a, Kohhran leh NGO (a bikin YMA) ang phei hi chuan he ‘hnam ralna hri’ ni mai thei tur lakah hian beihpui thlak hi a tul takzet lo’m ni?            

ENGTIA BEIH TUR CHI NGE NI ANG LE?: Chanchinbu lamah te kan lo chhiar tawh angin kan Minister remhria leh chak tak (health/MSACS changtu) bul tanna in MSACS leh YMA te’n thawhho dan tur tlangpui te an siam tawh hi thil lawmawm tak leh rah tha pawh chhuah chin nei ngei turah ngai ila. Hnam hnuk khawih  thei thil a nih theih miau avang hian sawrkar lam bakah YMA hlei hlei hian thahnem an ngaihtheih han beisei phawt ila. Kumin 2019 Krismas lo thleng mai turah hian YMA/Jt.NGO/VDP ang te chuan ruahmanna fel tak neiin tihtur pawimawh tak tak an nei ngei turah ngai ila, mipui te pawhin chutianga an hmalakna te tichak tura kan tawiawm ve zel chuan kan hnam eiral thei ral donnaah kan pawimawh vek dawn a lo ni.

Tin, Kohhran ang hian (NGO tel vekin) kan Bible enrema thawh hlawk dan a awm nual anga. Chung zinga entirna tlem han tarlang ila-
   

(1) II chr.7:13,14 ah chuan Pathian chuan, “…Vante ka khar hun ah emaw….hri te ka lentir hunah emaw chuan, ka hmingpu ka mite chuan inngaitlawma tawngtaia, min zawna, an awmdan sualte an hawisan chuan van atangin ka lo ngaithla anga, an sualte ka ngaidam anga “AN RAM KA TIDAM LEH ANG,” a tih avang hian he thu hi Kohhran ho zawng zawng hian kan zawm a hun hle lo maw?

(2) Tin, Lal Jehosaphata chu amah bei tura mipui tamtak mai lo kal chu hlauvin mipui zawng zawng nen chaw ngheiin Pathian an au va, tih ngaihna dang a hriat loh avanga a lam hawi mai zawk a nihzia te Pathian hnenah a thlen a, tichuan Pathian chuan an beih nasat ngai lovin a hneh sak tih kan hria (II Chr.20).

Tichuan kawng hrang hrang leh ngawrh taka he kan ram hri thalo tak lo thleng hi kan beih chuan hneh hun kan nei ngei ang.

A!! hnam pum huapa, Pathian au a kan tawngtai chuan kumin 2019 ah ngei pawh khan Citizenship Amendment Bill (CAB) parliament–a pass a nih loh nan Kohhran hruaitute (MKHC) rawtna anga Mizoram Kohhran zawng zawng kan tawngtai leh Vanapa Hall kawta ram mipui te’n tawngtairualna kan neih te kha Pathian chuan lo ngaithla a chhangin kumin ngeia CAB pass tum chu a tlawlh (hlawhchham) ta kha a ni a. Tichuan, CAB a ni emaw, HIV/AIDS a ni emaw, ram leh hnam tichhiaa min run tur chi hi mipuiin Pathian laka inngaitlawm leh rual taka kan do chuan kan ram hian damna a chang leh thei ngei ang tih kan beisei dawn lo’m ni?