DOWNLOAD OUR APP

Read latest news on your phone
app-store
South CHINA SEA & EAST CHINA SEA-AH INDONA A CHHUAK ANG EM? - C.T.Lalrinawma
Mar 08, 2014
("Chutichuan ngaihven rawh u, eng niah nge in Lalpa a lo kal dawn in hre si lo" – Matt 24:42)
Phnom Penh, March 6: Beijing khawpuia Chinese Communist Party-National People's Congress neih meka palai 3,000 te chuan lungrual takin China's defense budget 2014 chu 12.5% a puntir dawrhin US$ 132 billion (tluklehdingawn) a ni, kum kalta aiin a letin a pung! Chinese military experts-te chuan Asia-Pacific ah China thuneihna chu thang mekin, tun atanga kum 10-ah phei chuan kan chak leh zual dawn a, kan him (safer) zawk ang, an ti. An GDP pawh 7.5% in kuminah a thang leh ang. China economy chu kum 30 dawn a zawna a thopa zuan avangin military-economy ah US dawtah World No.2 an ni mek hian, Asia rama a thenawm ram 10 te ni mai lovin, America mut pawh a ti tui thei ta lo. A bikin East China Sea ah Japan leh South China Sea lama a thenawm – Philippines, Vietnam, Malaysia, Brunei leh Taiwan te chu hlauvin an khur ru a ni. Hetiang hi ni mahse, Chinese military experts te chuan midang tibuaitu (bully) ni lovin, a tuartu (victim) kan ni a; kan tuipui midangin min chuh pui tih ngaihdan neiin, East leh South China Sea tuipui chu a Keipui sa hauh ta hlur mai a ni. Kumin January ni 26 khan China tuihnuai lawng (submarine) chuan Malaysia chan tuipui lutin, South China Sea-a China leh Philippines-in nasa taka an inchuh mek, The James Shoal vaukamah (China-in Zengmu Reef an tih) China atanga 1,800kms a hlaah warship leh destroyers 2 chu an va ding tih a ni a; Malaysia's Navy chief erawh chuan he thu hi nasa takin a pha thung. He 'The James Shoal Island' hi oil leh gas tam tak a awm avangin Oil lama ril tam mek China tan chuan "lunghlu khur" tluka hlu leh an mit timimtu a ni. China chuan warships 3 an tirhte chu an ram (maritime & sovereignty) venghim tura chhechhamna an neih hnuah an lut a ni. He thil hian chuti lutuka an lo bengkhawn loh thilah inralrinna dar a khawnrik sak niin Tang Siew Mun, foreign policy specialist-Malaysia's Insitute of Strategic & International Studies chuan a sawi. Hemi hnu lawkah Malaysian Foreign Minister Anifah Aman chuan Philippines tlawhin, an sawi dun hi official-a puan ni lo mahse, South China Sea chungchang an sawi dun nia ngaih a ni. February ni 18 khan Philippines, Vietnam leh Malaysia ramte chuan "maritime code of conduct" hi Manila-ah an sawihova, March thlaa Kuala Lampur-a sawihona turah Brunei ram pawh a tel ang. China hian khawvel ram dang rawn lovin East leh South China Sea boruaka thlawhna thlawh vel dan tur (Code of Indetification Zone) alo puang tawh a, US-Japan, Korea leh a ASEAN ramten an dem hle a nih kha. South China Sea tuipui- 3.5 million sq kms a zaua 90% zet chu "Ka ta" tiin a hauh bur a, ama duh danin ramdangin an zawm tur Dan ( code of conduct) chu South China Sea tana hman turin a duang a; hemi chungchang hi ASEAN ram 10 te chuan March 18 khian Singapore-ah an ngaihtuah ang. Hetiang boruak rit tak in mung mekah US chuan China laka din (stance) dan tur tinghetin, February ni 13 khan US Navy Admiral Jonathan Greenert chuan South China Sea tuipui inchuhna leh buaina (conflict)ah Washington chuan Manila a tul angin a pui (aid) dawn a ni, ati hmiah. China chuan hetianga boruak tisosangtu chu Philippines tiin a puh. Kumin October thlaah The James Shoal Island hnaih, Bintulu-Sarwak ah Malaysia chuan America tanpuiin Marine Corps thar din a tum a, China hming lam si lovin "oil leh gas reserves venhimna tur" a ti. Malaysian PM Najib Razak chuan nikum Sept khan New York ah "China hian hmai hnih neiin (mixed signals) thu a sawi" tiin, Asian-a thenawmte tan rin ngam a harsa a ti. Admiral Greenert hian Malaysia a tlawh tumin, Marine Corps din dan leh training pek dan tur a sawipui a; US-Malaysia military thawhdunna tha tak awm tura ngaih a ni. Malaysia hian China chona emaw tilungnilo zawnga thujla neih chu Philippines angin a duh lova, UN Convention on the Law of Sea leh The Hague hmuna International Tribunal Court a khin ve kher chu a duh lovang. Kum 1974 khan China nen ASEAN ram zinga hmasa ber turin thuthlung alo siam tawh a, indona aiin tawngkaa sawi fel a duh a ni. Chinese President Xi Jinping-an nikum October thlaa Malaysia a tlawh tumin, kum 2017 a ram pahnihte insumdawnna chu US$ tluklehdingawn 160 tling pha turin inremna an siam a ni. East China Sea lama China leh Japan inchuh mek Sensaku Island (China-in Diaoyus Island a tih) chu US Navy Capt. James Fanell chuan China in rang tak leh reilote chhunga indona (short,sharp war) hmanga lak phut tumin training an nei tawh a ni, a ti. Heti ang a nih avang hian US chuan military/ defense budget US$90 billion dawn titlem mahse, Defense Secy Chuck Hagel chuan "Pentagon chuan Asia-Pacific lama nasa zawka beih pui chhuah a tum" a ti. Indona chhuak thut ta se, China lak atanga Philippines leh Japan venghim turin US hi a inpeih tak meuh a ngem? tih zawhna chu chhan thiam harsa tak a ni ta. China chu political-economy-military ah a chak chhovin, kum Zabi 21na chu a thunun tur anga an lo sawi lawk chu a thleng dik mek zel a ni. US chuan "Senkaku Islands" inchuhna avangin indona a chhuak thut anih chuan Japan chu venghim turin thutlukna chak tak siam mahse, lung khawkrawk tamna thliarkar avang ringawtin sum leh thisen a luantir duh chiah ang em? Washington chuan Tokyo chu fimkhur turin a hriattir a ni. Senkaku Islands vangin East China Sea boruak chu a sosang (tense) hle reng a, China Coast Guard lawng leh thlawhnate chuan nitin an vil reng vang a ni. Hetianga China zar buaina (harassment) hi Japan in hrethiam turin US chuan a duh. Beijing leh Tokyo chuan "hotline" neia an inbiak fo loh chuan indona chhuak thut thei reng a ni. Japanese PM Shinzo Abe lah chu mi luhlul leh duh rum (hawkish) tih niin, "China lakah Japan a tlawma hnehin a awm"tih ngaihdan pawm ngailotu a ni. China hian ama duhdana "code of conduct" a siam "nine-dash line" ah chuan Vietnam, Philippine leh Malaysia ram tuipui kam (coasts) a huam tir deuh vek a, hei hi US chuan khawi dan mah tlawhchhan tur (legal foundation) awm lo tiin, mahni duh dan dana "Dan zam" fo lo turin China alo hriattir tawh a ni. Hello, China!
MSSSB thiah leh thiah loh
Mizoram Subordinate Services Selection Board thiah tum hi eng nge i ngaihdan?
Thiah tha ka ti
Thiah kher tul ka ti lo
Ka hrethiam lo

Latest News & Chhiar Hlawh