Spain lakah Swiss keeper-in a pawlte a chhan zo lo

Admin - Jul 03, 2021

Spain lakah Swiss keeper-in a pawlte a chhan zo lo

Euro 2020 khelh meka semi-final lut tur zawnna game hmasa berah Spain leh Switzerland inkhelin, hun pangaiah 1-1 a an inhnehtawk hnuah mual chhunga chungnung zawk Spain chu penalty shootout hmangin an chak a semi-final an lut.

Krestovsky Stadium, Saint Petersburg, Russia a inkhelhah hian Swiss goalkeeper Yann Sommer chu a chetha hle a, goal ngei tura rin vawi tam tak a save a, mahse a pawl te a chak pui zo ta chuang lo.

Swiss lam hian vanduaithlak takin Zakaria own goal hmangin minute 7-na lekah si an phur nghal a, Switzerland lam vanduaina belhchhah turin minute 76-naah Freuler chuan red card a hmu zui. Hei vang hian minute 40 chuang zet player 10 chauhin an khelh phah. Game hmasa lama double yellow card hmuh vangin an captain chu mual chhung a lut thei lo bawk nen Switzerland hi chak zawk tura beisei ngam chi an ni lo.

Mahse, inkhelh tan hma atanga chungnung deuh zawk tura rin lawk Spain lakah hian Swiss mi paukhauh te hian tlawm mai erawh an tum bik lo. Huaisen takin an tumpuite an hmachhawn let a, extra time chhung zawng an goal khat neih chu hum tlangin penalty shoot-out an neihpui thei a ni. 

Euro 2020 semi final lut tur zawnnaah hian team hnihte hi an innawr tawk hle a, goal hlauhawm pawh an nei tawn zauh zauh. Minute 7-na leka si phur zawk Switzerland hian an goal phurh sut tumin theih tawp an chhuah naa first half chhungin goal a luh belh lo. Second half minute 67-naah Shaqiri-a goal hmangin Swiss hian an si phurh an sut thei hram.

Inkhelh tan hma hian Spain head coach Luis Enrique chuan thutlukna huaisen tak siamin, Croatia an hneh tuma starting XI zing ami pahnih Eric Garcia leh Jose Gaya te aiah Pau Torres leh Jordi Alba te a luh tir a, a tisual lo. An goal neih chhun Zakaria’n an lama a tih luh palh kha Alba goal shoot a lo khak per a ni. 

Extra time an khelh  zawhah penalty shoot-out neih niin Spain-in an chhuih hmasa a, keeper te that vang nge penalty-ah hian goal a lut tam lo hle a, Switzerland lam atangin mi pakhat chiahin a pet luh theih vangin Italy 3-1 in an chak ta zawk a ni.

Share now