Aizawl; Mizoramah chhan hrang hrang vanga kohhran huang chhung nilo, Court a innei an pung ve zel a, nikum leh kumin kal mek chhungin Aizawl DC hmaa The Special Marriage Act, 1954 (Act No. 43 of 1954 section 13) dan hnuaia innei nupa tuak 16 an awm.

The Special Marriage Act, 1954 (Act No. 43 of 1954 section 13) dan hnuai-a inneih hi kum 2003 atangin fel taka chhinchhiah tan a ni a, hemi hmalam ah pawh hian Court a innei hi awm mah se, chhinchhiahna mumal a awm lo.

Aizawl DC office atanga ZALEN thudawn danin, kum 2019 khan Court a innei tuak 20 bawr vel an awm a, nikum 2020 tuak 11 awmin, kumin ah tuak 5 an awm. Court a innei ah hian hnamdang an awm nual a, Mizo leh hnamdang innei te an awm.

Court a innei tur te tan hian Aizawl DC office atangin marriage form Rs 10/- a leiin, nu leh pa hming nen dik taka in ziahluh a ngai a, an awmna veng chhung VC/Local Council te hnen atangin veng/khua mi nihna lehkha lak a ngai bawk.

Dan ang thlapa e angkim buaipui fel a nih hnu ah Court ah inneih theih chauh a ni. Court a inneih dilna thehluh hi thla 3 chhung a nung a, thla 3 chhunga an inneih hman loh chuan a bul atangin engkim tih that leh vek a ngai a. Innei te hian marriage certificate Rs 250/- in an khul thin.