Indian parliament-a rorelna in hniam zawk chuan hmeichhiate tana parliament leh state rorelna ina seat awm hmun thuma thena hmun khat hauhsakna tur a pawm ta.

Hmeichhiate tana seat hauhsakna tur hi kum 1996 daih tawha pharh tawh kha niin political party tam takin an duh lohna karah kum tam tak tihkhawtlai a ni.

Nilaini khan darkar eng emaw zat sawihova inhnial a nih hnuah Lok Sabha-ah pass a ni ta a ni.

Bill hian rorelna in sang zawk, Rajya Sabha-a dan siamtute sawiho leh paltlang a la ngai leh dawn a ni.

Rorelna in sang zawkin a pass hnuah president-in a pawm leh a la ngai dawn a, a pawm hnuah dan a ni dawn a ni.

A tak taka hman erawh a la ngai rei deuh thei a, India chhiarpui neih leh hmasak ber zawh lam a la ngai thei.

Chhiarpui hi kum 10 dana neih thin a ni a, kum 2021-a neih tur kha a ni a; mahse, coronavirus leng avangin neih theih a ni lo va, kum 2025-a neih tumna a awm mek.

Sawi dan thenkhatah chuan tuna assembly bialte chu a ramri rin thata bial tihtam tumna a awm nia sawi a ni a, hetianga bial ramri siam that hi delimitation tih a ni a, bill pawm a nih hnuah thil a chiang deuh chauh dawn a ni.

Bill hi pass a nih chuan rorel lai, BJP tan nakum inthlanpuia chet that phah theihna a nih beisei a ni.

Nilaini khan Prime Minister Narendra Modi chuan Lok Sabha-a bill thlawptu MP-te hnenah lawm thu a sawi a. Politics-a hmeichhiate an inrawlh tam sawt theihna tur niin ‘dan siam chhinchhiahtlak tak’ a nih thu a sawi.

Bill hi MP 454 zetin thlawpin pahnih chiahin an thlawp lo a ni.

Lok Sabha-ah hian darkar riat dawn sawiho niin eptu member tam tak chuan a that tawk lohna lai sawi nual mah se a nawlpuiin an thlawp.

Congress president hlui, Sonia Gandhi pawhin an party chuan dan siam tur hi an thlawp tih a sawi a, rang taka hman nghal an phut tih a sawi.

“Kum engzat nge kan nghah a ngaih dawn, kum hnih, kum li, kum riat em ni ang?” tiin Gandhi-i hian a zawt a. “Tihkhawtlai hi hmeichhiate laka rorelna dik lo kalpuina a ni dawn a ni,” a ti.

Eptu MP tam tak chuan Other Backward Class (OBC) hmeichhiate tan pawh a hrana seat hauhsak an phut thu an sawi hlawm bawk.

Hinduism-in chi an thliar dan (caste system)-ah hian Brahmin, puithiam an tih bawkte hi a sang ber a ni a, Dalit (tun hmaa khawih thiang lo) leh Adivasi (tribal) an awm dawt.

Hengho karah hian hniam zawk hret leh sang zawk hret an awm nual bawk a, hengho hi ram mipui zinga 52% chuang mah niin OBC tia sawi an ni a. Chhiarpuiah erawh Dalit leh Adivasi tia telh an ni thin a, OBC an ti ngai lo.

Bill-ah hian seat hmun thuma thena hmun khat hauh niin hei hi Dalit leh tribal tana hauhsak a ni a, tunah chuan hmeichhiate tan hauh a ni dawn ta a. Seat hauh chhungah hian a hrana OBC tana hauh a awm tawh lo thung.

Nilainia parliament-a inkhawmah Gandhi-i chuan caste census nei ngei turin sorkar a ti a, hei hi OBC chhiarpui tihna a ni a, hei bakah hian hmeichhiate tana hamthatna tur dan dang ruahman turin a ti bawk.

Eptu MP thenkhat chuan he bill hi rorel lai party hmai phihna mai mai a nih thu an sawi a. Bill thlawp lotu MP pahnih zinga pakhat, Asaduddin Owaisi chuan he bill hi hnam thate zinga hmeichhiate chawisanna tur mai mai niin a sawi.