Aizawl: Sport Minister Robert Romawia Royte chuan nimin leh Zirtawpni khan a bial Aizawl East-II huam chhunga sawrkar hmalakna kal mek te a endik a. Covid-19 dona kawnga LLTF hmalakna te hmuhpuiin sawrkar hmalakna kal mek tihchakna atan te, pawl anga hmalakna tanpui nan leh thil tul dangah te MLA Fund atanga tanpuina sum a semchhuah bakah ama mimal sumin tanpuina a pe a ni.

Armed Veng Branch MHIP building sakzawm nan Rs 300,000/- chu Armed Veng Branch MHIP hotute hnenah MLA fund atanga a pek bakah Armed Veng LLTF te tanpuinan Rs 20,000/- MLA fund atangin a pe a. Mizoram Police Wives Welfare Association te hnenah mirethei te tana an rawngbawlna tanpui nan ama mimal sum Rs 50,000/- a pe a. Chite Veng MHIP tan Rs 200,000/- a pe a; Armed Veng South leh Chite Veng chhunga khawsak harsa deuh chhuangkuate tan MLA fund kaltlanga inhlawhna siam a tum thu a sawi bawk a ni.

Armed Veng, Armed Veng South leh Chite veng a tlawhnaah hian khawtlang hruaitute nen an inkawm a. Armed Veng khawtlang aiawhte chuan an bialtu MLA-in bialchhunga miharsa - AAY leh PHH ration card neitu mi 11,000 chuang tana thla 8 chhung a khulsak turah thla 3 ration a khulsak tawh avang leh Covid hripui avanga harsatnaah a ngaihsak avangin lawmthu an lo hrilh a ni. Minister chuan Armed Veng chhunga Field chhawng sak mek pawh Covid hripui leng chung pawha tluang taka sak chhunzawm zel a ni chu lawmawm a tih thu a sawi a, UD&PA hmalaknaa Armed Veng chunglam leh hnuailam inpawhna tur kawr chung lei pawh tender fel tawh niin thawh tan thuai a ni dawn tih a sawi a. Chite Venga Convention Centre Rs 4000 lakh chuang senga sak a ni dawn tih leh Chite Veng field ah phullem phah anih tur thu a sawi a. Armed Veng South Hall tihlenna tur project pawh Central sorkara submit anih tawh thu leh Futsal Ground siam tum anih thute bakah Armed Veng South MHIP Building siamthat dan turte pawh a sawi bawk a ni.