Sports Minister Robert Romawia Royte chuan Sub Junior Boys’ National Football Championship Tier-1 2023-24-a hneh loh nei lova champion ta, Mizoram a lawmpuizia a sawi chhuak a, Mizoram team a chhuang tak zet tih a sawi.

All India Football Federation (AIFF)-in a buatsaih Sub Junior Boys’ National Football Championship Tier-1 2023-24 hi Thawhlehni tlai khan khelh zawh niin Mizo rawlthar rualte hian final-ah Manipur chu si khat faia hnehin an champion a ni.

Sports minister chuan Mizoram team a lawmpui thu hi Zirtawpni zan khan a Instagram account-ah tar langin, “Mizoram kan champion leh ta. Ava lawmawm em!” a ti.

“Player-te leh coaching staff-te inpekna a fakawm tak zet a, state association hmalakna pawh theihnghilh theih a ni lo ang,” a ti a. “Mizoram sub junior team-te kan chhuang takzet a che u!” a ti bawk.

Sub Junior Boys’ National Football Championship Tier-1 2023-24 hi Pathianni hmasa atanga Malda leh Berhampore, West Bengal-a khelh kha niin team 16 an tel a, group paliah team pali zelin an inthen a. Group khata awmte an inkhelh kual hnuah a sang ber theuhvin semifinal an lut a ni.

Mizoram hi hian Group C–ah awmin Kerala, Maharashtra leh Odisha an awmpui a, an zavaiin an hneh a. Group stage inkhel pathumah hian Mizo rawltharte hian goal 15 zet thunin goal khat chiah an chhuah ve thung a, point kua hmuin semi final an lut.

Semi final-ah hian Group A atanga lut, Uttar Pradesh nen inhmachhawnin hun pangngaia goal a luh loh hnuah hun pek belh (extra time) khelin minute 94-a Isak Lalmalsawma goal hmangin hnehna an chang a, final an lut.

Final hi Zirtawpni tlai khan Berhampore khelh niin Manipur nen an inhmachhawn a, Lalruatdika, Henry Lalhnehzova leh Isak Lalmalsawma ten goal thunin si thum faiin an chak a, chiang takin hnehna changin India ram champion an ni ta a ni.