DOWNLOAD OUR APP

Read latest news on your phone
app-store

Spurs muala leng tur Champion lai Man City

Aug 15, 2021

Man City hian Tottenham star Harry Kane zaninah an hmachhawn a ngai mai thei

Premier League Champion Manchester City chuan an Premier League match hmasa ber khel turin zanin dar 9:30 hian Tottenham mual an lut dawn a, an title kawl lai humhim ngei tuma season bul an tanna turah hian club tha pangai tak Spurs hmaah fiahna hmasa an hmachhawn dawn a ni. 

Man City hian Tottenham star Harry Kane lakluh tumin an bei mek a, mahse pound maktaduai 100 zeta an ngam Kane hi zanin hian an hmachhawn a ngai maithei thung. 

City hian hmanni deuh khan English transfer record siamin Jack Grealish chu Aston Villa atangin £100 million in an lalut a, an player manto Grealish hi zanin hian a inlan ngei hmel. Tun nipui transfer hi August ni 31 zanlaiah a tawp dawn chauh a, Tottenham superstar Harry Kane hi Etihad lama lakluh ngei an duh chuan deadline thlen hma ni 15 chhung hian thu tlukna an siam ngei a ngai tawh ang. 

Nikum khan Spurs hian an mualah 2-0 a hnehna changin Etihad lamah 3-0 ngawtin an tlawm thung a, Tottenham lam hi an coach thar Nuno Espirito Santo hova intuai thar mek an nih vangin awlsam taka hneh mai theih an ni dawn lo tih a chiang. Team pahnih te inkhelhah hian goal a lut duh hle a, kum sawm chuang chu goal awm lova indraw an nei tawh lo. 

Tottenham star Harry Kane hi City lamin lak tumin bei ngawrh hle mah se, zanin hian Spurs tan a inlan ngei rin a ni a, lut thar Cristian Romero chu a khup hliam vangin zanin hian a inlan theih hmel lova, Bryan Gil erawhin a bul a tan theih hmel. Ke hliam vanga kar li zet chawlh tur City midfielder Phil Foden leh kum 30-a upa Belgium midfielder Kevin de Bruyne chu Euro 2020-a a kheimit hliam vanga chawl te pahnih chu an la chhawr ngam a rinawm loh. 

Spurs hian top-flight match tan tirhah Manchester City hi tum thum hmachhawn tawhin tlawm an la nei lova, vawi khat chakin tum hnih an draw a ni. Premier League match bikah Manchester City hi Spurs lakah tum 15 zet an tlawm tawh a, season hnuhnung pahnihah an tlawm ve ve bawk. Premier League bika an hneh loh zin ber Liverpool (16) dawta an ngam loh zin ber chu Spurs hi an ni ve tlat.

Manchester City hian away game-ah a zawnin tum thum zet Tottenham hi an hneh tawh lo bawk. Manchester City hi an match hmasa berah an vanduai thei ve khawp a, an chakna hnuhnung ber pawh kum 10 lai a liam tawh a ni. 

Nikum lam khan Spurs hi an chetha tawk lo hle a, a sang pali zingah lang phak lovin Champions League an khel phak dawn lova, tin, Carabao Cup final-ah Manchester City lakah an tlawm zui bawk. An manager thar Nuno Espirito Santo-a hnuaiah north Londoner te hian tun hmaa an luah thin top four zinga tel leh ngei an tum dawn a, friendly match-a an North London club pui Arsenal 1-0 a hneh hlim an nih vangin inrin tawkna nen an khel thei ang. 

Zanina an khingpui tur hi nikum lam khan season bul lamah an chetha nghal pur pur lo va, fei taka dingin season tawpah chuan an hmelma hlun Manchester United aia point 12 ngawta sang fala Premier League title chawitu team kha an ni. City hian an duh leh hun rei tak chhung an beisei tawh Champions League trophy chawi thei lo chiahin final-ah Chelsea an ngam lo a nih kha. Kar hmasa Pathianni khan Pep Guardiola-a naute hian FA Community Shield, Wembley Stadium-ah khelin Leicester City lakah sikhat faiin an tlawm a ni. 

Zanin inkhelhah hian Tottenham lam hian 4-2-3-1 lineup an  hman a rinawm a, chutiang a nih chuan friendly match-a Arsenal laka chakna goal thuntu Son Heung-min hi hmatawngah an dah leh ngeiin a rinawm. A tuanranna leh a thiamna vangin Man City tlarhnung chu a chhaih buai ve viauin a rinawm. 

Manchester City lam hi 4-3-3 formation-in Guardiola hian a rawn rem leh a rinawm bawk a, Riyad Mahrez leh Ferran Torres te chu atangkai thei ang bera chhawr atum ngeiin a rinawm. Manchester City player zingah Algerian Riyad Mahrez hi pre-season-ah a che tha fal hle a, a ball thiamna leh a shoot tha tak hi Manchester City tantute tan chuan thlamuan pui tham a tling. 

Share now