ZALEN, February 10, 2026: Board of Control for Cricket in India (BCCI) Senior Women’s One Day Trophy Plate-a group match inkhelah Mizo nulate chuan nuamsa takin Manipur an hneh a, thenawm state nulate lakah hian over 50 khelh turah over 20 dawn hmang bângin wicket rukin hnehna an chang. 

Barabati Stadium, Cuttack, Odisha-a tournament-a an inkhelh vawi thumnaah hian Mizoram hi thum vawrah chakin vawm an thlang a, a vawmtute an che chhe lo hle a, Manipuri wicketkeeper/batter Kalpana chuan run 47 thawh mah se a thian dangte zinga pakhat dang chauhvin Mizo vawm run 10 chuang siam thei an awm a, over 47.5 chhungin run 103 chauh siamin an thi hman vek.

Mizoram tan Zothansangi chuan over 10 a vawmah run 19 chauh pein Manipuri batter pathum a vawm hlum a, state pawn atanga lak, Unnati S Naik-i’n wicket thum tho lain Mizoram Under-19 tan pawha thawhhlawk tak, Sandhia Rai-i'n mi pahnih a vawm thi bawk.

Mizoramin chak tura an mamawh run an umnaah wicket hma takin hloh mah se bul tantu pakhat zawk, Lalrinfeli Pautu chuan run 29 a vaw chhuak a, state pawn player dang, Palak Patel-i nen rei tak ding dunin ani hi a tawp thlenga damin run 46 a siam a. An pahniha an thih hnuah Lalhmangaihsangi (run 10*) leh Naik (run 5*) te chu a tawp thlenga damin over 30.4-ah mi pali chauh thiin Manipur run siam an umphak a ni.

Senior Women’s One Day Trophy Plate khelh mekah hian group stage inkhel hmasa pahnihah Mizoram hian Nagaland leh Sikkim an hneh lo tawh a, vawi hnih khelh la neiin Ningani hian vawi thum khelha la chak vek, Bihar nen an intum leh ang a, a tawp berah chak la nei lo, Meghalaya an hmachhawn leh bawk ang.

Khelh thumah vawi khat chauh an la chak avang hian Plate final lut turin an kawng erawh a zim hle tawh a, khelh hmabak pahnihah hian chak ve ve pawh ni se mi dang result-ah an innghah tel a ngai tawh a ni.

INKHEL KHAIKHAWMNA

Manipur - 103/10 (Over 47.5)

Kalpana - 43 (107)

Zothansangi - 3/19 (Over 10)

Mizoram - 104/4 (Over 30.4)

Palak Patel - 46 (66)

Lalrinfeli Pautu - 29 (68)

Wicket rukin Mizoram an chak.