Mizoram Youth Commission leh Labour and Employment hmalaknain tunhnai khan Skill Fest neih a ni a, thalai tam takin an bawr a, a hlawhtling hle a ni. Thalai hna neilo te’n an thawh tur tawk an hmuh theih nan he hun hi buatsaih a ni a, hetah hian hun rei vak lo chhung training pe a hna hmuh sak thintu (vocational training provider) 27 an inpho a ni. Thalai hna neilote tana hun bik siam (job fair) hrim hrim hi hmun dangah pawh neih a ni fo thin a, sawrkar ni lo mimal ang pawhin state dangah chuan huaihawt a ni tawh thin a, kan ramah a vawikhatna a ni a, hei hi a tihlutu a ni. ‘State danga hnathawk tura thalaite thawn chhuah a ngai’ nia hriat nain sawrkar a nawr kal a ni mahna. Mizoram hi a awmna a kil khawra, hmun danga thalaite angin a tam zawk chu an hawiharh lem lova, eizawnnaah phei chuan ramdang chu sawi loh state dang thalaite min phak loh tir hial awm e. Electronic media-ah ram dang thalaite hmasawnna hmu thin mahila rilruin a tak ram a pawh phak tawh si lova, rualawhna tluantling neih a har tawh thin. Hetianga thalaite an awm lai hian hna zawn sak thei nia infak kur ngei nguaia a hnua ni leh chiah si lo thalaite hian an tawng zauh zauh tawh a, pawn lam atanga rawn lut tawh phawt chu rinhlelh na nen an chang tawh thin a ni. Sawrkarin a chahchhuah te hi hna chungchanga Central sawrkar lama inziaklut vek an ni a, an him thawkhat niin thuneitute lam chuan an sawi a ni. Training tura lakte hi thawnchhuah an ni tan tawh a, hlimhlawp thila feh chhuak thei an ni lova, training an paltlang hnuah a ti thate chauhin, hna an hmu dawn a. An thawh hnuah pawh rim takin an thawk anga hna sang a nih lem loh avangin ina an tih ngai loh an tih a ngai dawn a ni. An hmalam hun tur hi thuneitute pawhin chiang taka an hrilh mawlh mawlh a pawimawh hle mai. Hmun danga hnathawk te hi an hahdam ngawt lova, eizawnna tling tur chuan eng hna pawh nise rim taka thawh a ngai tho tho! Chhuan thar kal mek zelah hian nu leh paten mawhphurhna sang tak an nei a. Rim takin thawk mahse an fate chhel an zirtir chuan si loh chuan chhuan thar puitling mai tur hian Zoram hi engtin nge an enkawl ang? tih hi zawhna tling a ni ta. Sawrkar lamin thalaite tan hna chungchangah hun thar hawn zel a tum a, nu leh pate lamin hnathawk tlak an­­­ chher chhuak tur a ni.