March 20, 2024; Addl. Chief Electoral Officer Dr. H. Lianzela Nodal Officer, Media Cell kaihruai State Level Certification Committee (SLCC) chu vawiin chawhma dar 10:30 khan Political Adrvertisement pre-certification dilna lut ngaihtuah in an thukhawm.

State Media Centre, CEO Pisa thutkhawm ah hian Addl CEO Dr. H. Lianzela hovin Political Advertisement Pre Certification tih ngai dilna lut endik a ni a, ECI in dan leh hrai a zam te zawm a ni em tih endik niin Political Party pakhat atanga pollical advertisement pre-certification dilna lut chu ECI in Pre Certification tihna atana dan zawm tur a siam te hmangin uluk taka endik a ni a, endik naah hian dan pela thil tih a awm loh avangin thurawn tlem siamin pawm a ni.

Electronic Media kal tlanga Political Advertisement chhuah tur reng reng te chuan Election Commission of India-in a din Media Certification and Monitoring Committee (MCMC) hnenah chhuah phalna (pre-certification) an dil hmasa zel tur a ni a, electronic media hian Social Media pawh a huam tel bawk a ni.

TV Channel/Cable Network, SMS/voice message,Cinema Hall, Radio & Private FM channel, vantlang hmuna Audio-Visual Display, Internet leh Social Media Website-a Political Advertisement tihchhuah turah pre-certification tih zel a ngai a, mimal account/blogs/website/social media platform hrang hranga thuchah, thlalak dah, comment, video etc a politics thil tarlante chu Political advertisement-ah chhiartel a nilova, party/candidate-in an chhuah chhawn pawhin political advertisement-ah chhiar a ni lo, pre-certification pawh tih ngai lovin, Model Code of Conduct bawhchhiatna erawh a awm tur a ni lo.

Candidate hming leh hamthatna tura advertisement siam reng rengah chhuah phalna District Level MCMC hnenah an dil hmasak tur niin, Party leh pawl State Hqrs. a awmte tan State Level MCMC Addl. CEO kaihhruaiah dilna thlen tur a ni. Candidate/Party-te tan chhuah hun tur thlen hma ni 3-ah dilna thehluh hman a ngai a, mimal/pawl tan erawh chhuah hun tur thlen hma ni 7-ah dilna thehluh hman a ngai thung. Dilna te hi ni 2 chhunga ngaihtuah zawh hman tur a ni.

Chanchinbu (Print media) kaltlanga chhuah turte tan erawh vote thlak ni leh a hma chiah ni atan pre-certification tih tur a ni. Candidate remtihna a ni em tih finfiah tur a ni a, a remtihna nilova chhuahtu (publisher) chu Section 171H of IPC hmanga hrem theih a ni.