ZALEN January 29, 2025 : State Day of Prayer Committe chuan vawiin khan Aizawl Press Club-ah Press Conference an ko a, February 20, 2025 State Day-a tawngtai rualna State Day of Prayer an buatsaih leh tur thu an sawi a, thupui atan hian 'I ram lo thleng rawh se' tih ani dawn a, mi zawng zawng tel turin an sawm.

State Day of Prayer hi nikum khan hman tan niin sual thupa chawina lam hawia tawngtai a nih avangin Ninevi Challenge tih a ti a, kum inah chuan ram tihdam lehna 'siamthar lehna' hawi a nih avangin Fiji Challenge tih a nih ang. State Day of Prayer Committee chuan he thupui an hman chhan chu Kohhran pawl hrang hrang ten inlungruala an sualte sima an tawngtai avanga Pathianin Fiji ramah malsawmna ropui tak a a thlensak avangin tunah chuan kristian ram duhawm tak leh intodelh ramah a lo chang ta a. Mizorama pawh hi thuawih taka kan awm chuan pathianin kawng hrang hrangin mal min sawm ve ang tih rinna leh beiseina avangin Fiji Challenge tih a ni.

Kumin State Day of Prayer hmanna pui ber chu Lammual-ah neih tum a ni a, main Speaker atan Lalduhoma, Chief Minister leh Frederick Lalrindika te ruat niin nikum lam aia tawngtaina tam zawk hman tum a nih thu State day of Prayer committee chuan a tarlang a. Zaipawl Pui Member 1500 awmna din tura hmalak mek a ni a, tin, Kohhran hrang hrang thalaite leh tawngtai mite ah State Day of Prayer pual a zan chanve tawngtai buatsaih tum a ni. District tinah leh khaw tina hman a nih theihnan ruahmanna kalpui mek a ni bawk.

State Day of Prayer 2025 buatsaih turah hian Mizoram Kohhran Hruaitute Committee (MKHC) leh Council of Churches in Mizoram (CCM) te pawh biak rawn tawh niin Kohhran hrang hrang te inpumkhatna nen, hmun khatah thupui pakhat hmanga Pathian au in ramin Pathian malsawmna tluantling a dawn theihnan hmalak ho mek a ni.

Political Party hrang hrang te tan pawh hun siam tum a ni a, tawngtaipui an ngaihna lai theuh thawh tur a sawm an ni. Minister, MLA leh Sawrkar hnathawk zawng zawngte pawh mipuiten an tawngtaisakna hun tur siam tum a ni bawk.

State Day of Prayer Committe chuan tun tuma an senso hi sawrkarin a tum dawn lo an an ti a, mimal tinte leh pawl thahnemngaite inpekna atanga dawng khawm turin rinnain an kal tawp an ti. Chuvangin rama tana hmalakna hi mi tinin mahni remchan anga pek theih a nih tih an sawi a, an Treasurer Chalthanpuii G-Pay No 9436142870-ah a tlem lua awm lova thawh theih reng a nih thu an sawi.