Street bike ngainatute tan thu lawmawm hriat tur a awm e - Keeway SR125 chu India ramah tlangzarh a ni ta. Keeway India chuan retro-style SR125 hi Rs 1.19 lakh (ex-showroom) in an zuar chhuak a, 125cc motorcycle zingah chuan manto ber pawl a ni ngei ang. A man a to deuh avang hian lo hnual ngawt lo la, tun lai thiamna sang tak hmanga thuam a nih avangin khalh a nuam dawn tih a chiang. 

A design pawh a simple hle a, belhchian erawh a dawl viau. A tanky-ah hian litre 14.5 a leng a, halogen headlight a hmang.  125cc, air-cooled, single-cylinder engine, 9.7hp leh 8.2Nm a ni. Keeway SR125 hi Honda Shine, Honda SP125, Bajaj Pulsar 125 leh TVS Raider te nen pawh khaikhin a hlawh viau a, a rih zawng hi kg 120 a ni thung. Rawng chi thum - Glossy Black, Glossy Red leh Glossy White te duhthlan tur a awm nghal bawk.