Sumdawnna idea intihsiakna reality Show hmasa ber 'Minute Khat Pheichham' chu nizan khan zawh fel a ni ta a, result puan nghal a ni. Intihsiak zingah Puan Zarna (Recycled Plastic) idea neitu Lalfakawma chu pakhatna a ni a, Lallawmkima Ralte (Kuhva rah kawr Arecanut Fibre Processing) chu pahnihna niin, Biofloc Fish Farming idea thawhtu Malsawmtluanga chu pathumna a ni. 

Pakhatna hian lawmman pawisa fai Rs. 1,00,000 a dawng a, pahnihna hian Rs. 40,000 dawngin lawmman pathumna latu hnenah Rs. 20,000 a dawng a ni. Consolation prize mi 10 hnenah Rs. 2000 theuh pek tur a ni a, thuziak a keng tel bawk a ni.

'Minute Khat Pheichham' hi MZU Incubation Centre, MEDMOC leh Zonet Cable Ptv Ltd. tangkawpten an buatsaih niin, final programme hi Hyve,  Aizawl City Hall-ah neih a ni. Show-a tel tura diltu mi 338 zingah thlitfimna paltlang final contestant 20 te chuan business idea an neih te chu minute khat theuh an sawi a, endiktu mi pali ten a tha ber ber an thlang chhuak ta a ni. 

Finalist te hi Mizoram Consultancy chuan July thla khan ni thum chhung boot camp neih puiin, hma an sawn theih nan constestant te an hrual a ni. 

Intihsiakna a nih rualin inzirtirna a nih avangin Mizoram chhungleh state dang atangin panel of expert mi pariat te chuan nachang hre taka sum dehchhuah thiam bik entrepreneur te leh nih tumte tan thu tha tak tak an sawi thin a, hengte hi Zonet TV leh YouTube lamahte pek chhuah thin a ni.