DOWNLOAD OUR APP

Read latest news on your phone
app-store

Super IAS programme kalpui dawn; Written exam hmachhawn tur mi 575

Jun 23, 2022

Full sponsorship hnuaia kalte chuan prelims exam vawi 2 an hmachhawn hma chuan central leh state hnuai a hna exam phalsak an ni dawn lo a, bond sign tir vek an ni ang. Thlanchhuahte chu Vision IAS, ALS leh Vajiram & Ravi IAS coaching centre ah te dah an ni ang a, nakum 2023 prelim exam dawn thleng an awm ang.

June 23, 2022; Mizoram Youth Commission (MYC) chairman, Dr. Vanlaltanpuia chuan, kumin atan Super IAS 40 programme ruahman a ni tih sawiin, Super IAS full sponsorship hnuaia kalte chuan, prelims vawi 2 an hmachhawn hma chuan central leh state hnuai ah hna exam phalsak an ni dawn lo tih a sawi.  

Vawiin khan MYC conference hall, MINECO ah thuthar thehdarhtute kawmin, MYC chairman chuan, Mizote tana tha ber ni a an hriat Vajiram & Ravi, Vision IAS leh ALS ah te Mizo thalaite dah an rilruk tih a sawi a, engtikah emaw chuan he hmalakna hian hlawhtlinni hmel hmuin, kan thalaite zingah IAS ngei pawh neih thuai an beisei takzet tih a sawi.

Super IAS programme kalpui turah uluk leh zual zawkin ruahmanna siam a nih thu te, chumi atan chuan screening test exam centre pawh hmun 5, PUC, JB College, Lunglei, Govt. College, Siaha, Govt. Kolasib College leh Mizoram pawn a awm exam duhte tan Delhi centre buatsaih a nih thu te MYC chairman chuan a sawi bawk.

MYC chairman sawi danin, Super IAS programme ah written exam nei tur mi 575 an awm a, naktuk ah exam hmachhawnin, written result June ni 27 ah tihchhuah a ni ang a, ni 28 leh 29 ah personal interview neiin, July ni 1 ah interview result tihchhuah tum a ni a. July ni 10 ah coaching centre lut hman tur a ruahman a ni. Interview neihna hmunah panel of chairman atan Mizoram Central Service a awm official te hman an ni ang a, panel member ah Vision IAS lam an ni ang. 

Thlanchhuahte chu Vision IAS, ALS leh Vajiram & Ravi IAS coaching centre ah te dah an ni ang a, nakum 2023 prelim exam dawn thleng an awm ang. Zirlai pakhat zel-ah coaching kalna senso Rs. 1,40,000-1,80,000 inkar a ni ang a, hetah hian hostel fee chhut tel a la ni lo.

MYC chairman chuan tun ang reng a kan kal chuan kum reilote chho ah chuan central service kan neih chhoh zut zut theih a rinawm thu te sawiin, hetihlai hian tun dinhmun ah chuan Mizo thalaiten All India Service kan cho tawk lo nia a ngaih thu sawiin, chu chu written exam hmachhawn tur mi 575 chauh awmin a tichiang nia a ngaih thu a sawi. "Kan comfort zone ah kan inkhung a, chuta tanga kan chhuah chu a ngai," tiin, "Tun a kan hmalakna ah hlawhtlinna kan nghakhlel a, hlawhtlinna a awm thei lo a nih chuan a mawhphurtu tur chu keimah ka ni ang, min rawn kawk tawh mai a niang chu," a ti bawk.

 

  1. Super IAS 40 programme:-
  2. Written exam a 50% hmu tling chin atangin Merit list in interview tur koh an ni ang. (50% hmu tling mi 40 an tlin loh pawhin, a tling chhun chhunte lak an ni ang.)
  3. New Delhi a MYC in a tirh thlak tur te hi bond sign tir vek an ni ang.
  4. Full sponsorship hnuaia kalte chuan prelims exam vawi 2 an hmachhawn hma chuan central leh state hnuai a hna exam phalsak an ni lovang.
  5. Uluk taka vuil zui an ni ang a, an awm danin a zir loh chuan, full sponsorship tih tawp leh sawrkarin a senso pawh rulh let tir dan tur thlenga intiamkam tir an ni dawn.

 

Share now