DOWNLOAD OUR APP

Read latest news on your phone
app-store

Supply department leh kohhrante

Nov 22, 2014

Supply department leh kohhrante

Tun hnaiah Supply department chuan krismas leh kum thar kan hman chhoh turah kohhran tinte chu supply department-a buhfai dil lo tura ngenna a siam thu chanchinbu leh TV-ah kan lo hmu a. Hun eng emaw chen atang khan Mizorama kohhran hrang hrangte hian krismas leh kum thar vuakvetah te, inkhawmpui lian kan hma chhawn dawn reng renngin supply department-ah buhfai leh a thlawna thil dawn theih dangte kan dil thin. Chu chu chin than leh tihmakmawhah kan nei tawh a, special quota leh permit a awm lai pawh khan kohhran hrang hrangte chu sawrkar pawhin a dah pawimawh hle thin. Kohhran khawmpui lian kan neih dawnin khawmpui lian neihna hmun bialtu MLA chu buhfai leh pandal sakna thlenga tum sak turah kan ngai hmiah tawh bawk. Hei thil hi kohhran mai bakah YMA leh NGO dangte pawh hian a tur ve rengah ngaiin Minister leh MLA te chu kan bawhbuai hle thin a, Minister/MLA te pawhin kohhran leh pawl thil anih avangin an zah a, sum harsa chung chungin an theih ang angin an ngaihtuahsak hram hram zel. Kohhran a ni emaw, YMA leh NGO dang emaw pawh ni se, kan hun pui ber krismas lo thleng tur te, kan khawmpui lian neih turte hi hre lawk lo kan ni lova, a hma daih atanga lo in hmakhua lawk nachang kan hre ngai lo. Ruai theh dawn hian sa chi hrang hrang mante hi a to tawh em em a, a man tlawm ber ‘buhfai’ a rate aia tlawm leh a thlawn deuh thawa hmuh kan tum tawh zel mai hi zawng kan inenlet a ngai tak meuh a ni. Kawng engkimah supply department kan hnik leh kan bel bul reng mai hi a fel lo hle. Kan sorkar sum dinhmun pachhiatzia kan hria a, Supply Minister leh department tan lakna avangin hun khirhkhan lai ber pawhin kan khawsa thei tawk tawk a. Mizoram mipui mamawh quota mil ang zela buhfaite hi chawlut kan ni a. Kohhranten buhfai supply department atanga buhfai an pawhpen hian kan indaih loh phah thin a, hmun kilkhawr zawkah a thlenna hmun tur a thlen loh phah thin. A tuartu ber chu ration card hmanga buhfai ring, mi rethei tete leh thingtlang hmun hla zawka chengte an ni. Hei hi tun sorkar thara Supply Minister hian a hmu fuh hle niin a lang a. Kohhran leh tlawmngai pawlte hi Supply Minister hian a ngaih pawimawh loh vang lam ni lovin; tha leh dik nia a hriatte chu huaisen tak leh sawisel pawh huamin a kal tlang pui mai zawk niin a lang. ‘Kan lo tih thin dan’ tih ringawt chhuanlam a, a tha lo tih hriat reng pawh a ngai ang pata kalpui reng hi hnam hmasawn lo zia a ni tih kan hriat reng pawh a tul. Heti khawpa sum leh pai lama harsatna kan tawh mek laia a tlaran zawnga kan kal zel chuan a hnam ang pawha kan hmabak hi a ko hle ang. Supply department atanga kan dawn ‘ration’ a ni emaw, PWD leh department dang hnuaia contract leh supply kan thawh thin dan te, kohhran leh NGO-in kan chin thin dan te, mimalin kan chin thin dan thlengin kan insiam that thuai a ngai. Heng zawng zawngte hi kan insiam that thuai loh chuan Mizoram hian tah leh ha thial mai bak chu hmabak dang kan nei lo vang. — - V.L.Nghaka
Share now