Aizawl August 6, 2024 : MNF Legislature Party (MLP) te chuan tunhnaiah Food Civil Supplies & Consumer Affairs Deptt-ah nasa taka Sawrkar dan dinglai bawhchhiat avangin Deptt. in buhfai a leinaah mipui sum tam tak mimal thenkhat leh anmahni duhsaktute kutah a luanglut niin a lang an ti a. Supply Minister leh a Deptt.-ah thil diklo tam tak an hmuhchhuak niin an sawi.

Supply Deptt. in buhfai lei tura Tender chhang hniamber RL Store, Kulikawn te chu dan palzuta hnawlin a aia nasa taka chhang sang zawk LZ Juice, Melthum te supply hna tam tham tak pek an ni, an ti. Supply Deptt.-in RTI Act dan anga zawhna an chhannaah tender chhang hniam ber RL Store. Kulikawn an thlanloh chhan chu Buhfai C Grade supply tura Tender an chhan vang niin ziakin an chhang. Mahse RL Store ten Tender an chhanna copy-a alan danin Buhfai A Grade supply tura chhanna pe ngei an ni tih a chiang a ni, an ti.

Supply Minister zahawm takin ZPM Thalaite political training ni 17.7.2024-a a thusawiah ‘Buhfai supplier thlannaah a inrawlh lo’ a ti niin a sawi a, mahse SPAB Minutes hi File ah a approved ngei a ni tih notesheet-ah chiang takin a lang an ti. MLP te chuan dan zawm lova buhfai man to zawka lei anih avanga sum nuai za tam tak chingpenah hian Supply Minister ngei hi a mawhphurtu ah an ngai a, Chief Secretary leh midangte a puhmawh hi pawm chi ah an ngailo.

Supply Deptt. hmalaknaa ZPM sorkarin Card var hmangtuten buhfai Rs 15/- per KG a an lei thin Rs 30/- per KG (100% a tihsan) dan hi a uchuak an ti a. Hetiang mi tam tak khawsak relna kawnga harsatna siam tur chungchanga RAWTNA intan dan leh thutlukna siam a nih dan hi MNF MLP chuan pawmtheih niin an hre lo. ZPM sawrkarin buhfai man 100%-a tipung tura thutlukna a siam hi rang taka ennawn ni se an ti.

MLP chuan Hachhek biala Mizo khaw hlun tak Phuldungsei khuaah Mizoram Ration Card neitu mi 85 lai chu an Ration Card paih sak (deleted) anni chu Hnam pawikhawihna lian tak a ni, an ti.