Chawlh hmanna lawng lian (cruise ship)-a chuang mi 800 chuang zet chuan Covid-19 an kai tih finfiah a nih hnuah Sydney, Australia-ah dintir mek a ni.

Majestic Princess hi New Zealand atanga a chhuah hnuah Circular Quay a thleng a ni.

Lawngchawlhnaa a din hlimah hian passenger leh thawktu mi 4,600 chuang an chuang a, mi panga zela pakhatin hri an kai tihna ang vel a ni.

Tum tuma cruise ship-a hri darh leh hi kum 2020 tir lam, Covid len tan tirh laia Ruby Princess cruise ship-a a darh nen khan a inang deuh va. Kha lawng lianah khan  mi 900 vel lai hri kai awmin mi 28 an thi.

Cruise operator Carnival Australia president Marguerite Fitzgerald chuan hri kai an awm thu hi zinkawnga ni 12 an thang chhungin a chanve vel an thlen atangin an hria tih a sawi.

Hri kai zawng zawng hi natna lang chhuak lo leh a lang chhuak pawh na an ni lo va, ngaihtuahawm an awm hlawm lo.

Thawktute chuan mi chuang zawng zawngte chu hri an kai leh kai loh endiknaah buaipuiin ‘khung hran an ngaih chhungin mi mal zin veivahna leh awmna hmun neitute’ an dawrsak niin an sawi a. Lawng hian Melbourne a pan zui ang.

Operator thuhmun hnuaia awm, Majestic Princess leh Ruby Princess chungchangah Fitzgerald-i chuan, “A hmaa mi nena khaikhin chuan mi tam takin Covid chungchang hi kan lo hre bel tawh,” a ti.

Lawng liana hri a darh tih thawm a awm leh mek lai hian Australia ram pumah Covid kai hi an pung thar leh mek bawk.

New South Wales-ah chuan ni sarih liam ta chhungin mi 19,800 chuangin an kai tih hmuh chhuah a ni.