ZALEN, December 06, 2025: Mizo tlangvalten bul tan tha tawk lo mah se Syed Mushtaq Ali Trophy Plate-ah an champion a, group league-a an hneh loh tawh, Sikkim chu run 10-in an hneh a, season tharah a thiam rual inelna, Elite huangah an tel thei dawn.

Board of Control for Cricket in India (BCCI)-in an hnuaia association senior team-te Twenty20-a inelna a buatsaih Plate final hi Inrinni tlai khan MCA Cricket Stadium, Gahunje, Pune, Maharashtra-ah khelh niin thum vawrah Sikkim chakin vawm hmasak an thlang a, an tifuh a tih theih.

Mizoram opener pahnihin run li ve ve chiah an siam tihin an vawm hlum nghal a, captain Joseph Lalthankhuma (2) leh Vikash Kumar (1) ten an zui chhuak nghal bawk a, mi pali an thihin run 13 chauh an la siam.

Johan Lalbiakkima’n ball 30 hmachhawnin run 21 chauh siamin K.Vanrotlinga'n ball 26-ah run 33 a vaw chhuak bawk a, dinhmun kang hretin over 14.2-ah run 82 siamin mi paruk an thi.

Vanrotlinga leh thih hnuah KC Cariappa chuan ball 18 a hmachhawnah four leh six run vawi li ve ve vaw chhuakin run 52 a vaw chhuak a, Player of the Match-a thlan zui tak hian dinhmun thaah Mizoram dah chhuakin over 20-ah run 148 an tlin theih phah.

Sikkim-in an umnaah bul an tan chhe lem lo va, over hnih lekah run 25 an tlin thei a; mahse, opener pakhat zawk chu B.Lalnunfela’n run 14 a siamah vawm thiin a hnuah pawh run an vaw chhuak chak viau a; mahse, over 7.5-ah mi pathum thiin run 65 an tlin.

A khât tawkin Sikkim-in wicket an hloh zauh zauh va, run an siam muan chhan langsar ber chu Ramhlun Venglai, Aizawl tlangval, Vanrotlinga a tih ngam a, wicket la lo mah se over li a vawmah run 19 chiah a pe a. Hunthar bowler Nunfela’n mi pahnih vawm hlumin Karthik CA chuan mi pahnih a vawm hlum ve a, over 20-ah run 138 an tlin a, mi pasarih an thi a, an hneh tawh lakah an chak lo.

Mizo tlangvalte hian kar kal ta Zirtawpni khan Sikkim hi wicket sarihin an lo hneh lo tawh a, tun tumah hian phuba lain nomawi an hawn ta a ni.

2025-26 kal mekah hian Mizoram hi Women’s U-19 T20 Trophy Plate-ah an lo champion tawh bawk a, nomawi pahnih an lakna a ni ta a ni.

INKHEL KHAIKHAWMNA:

Mizoram - 148/9 (Over 20)

KC Cariappa - 52 (18)

K.Vanrotlinga - 33 (26)

Sikkim - 138/7 (Over 20)

Karthik CA - 2/28 (Over 4)

B.Lalnunfela - 2/31 (Over 4)

Run 10-in Mizoram an chak.