Aizawl; Mizoram ah kohhran hmun (Biakin) ni lo, hmun danga inneih (Wedding tourism/Destination wedding) buatsaih remti lo kohhran an awm laiin, remti an awm bawk a, Synod moderator Rev. Dr. C. Lalhlira chuan an kohhran kalphung nen a inmil loh avangin tih chi-ah an ngai lo tih ZALEN a hrilh.

Thudawn danin Mizoram sorkara Tourism department chuan tun hnai khan kohhran thenkhatte chu Wedding tourism chungchanga an ngaihdan an zawt a, Presbyterian kohhran leh Salvation Army-ten an remtih loh thu an thlen tawh a, Baptist Church of Mizoram (BCM) leh Catholic-in an la chhang lo. Wedding tourism-a tan Chawlhhmuna an Temple hman an dilna chu Kohhran Thianghlimin an remtih loh rualin, inneih thlalak nan erawh an hmunhma hman an phal thu an thlen.

Mizoram UPC chuan biak in pawn lam a inneih buatsaih chungchang chu tualchhung (Local) kohhran committee thutlukna siam tur ah an dah a, 7th Day Adventist chuan innei turte duhthlannaah dahin, inneihtirtu tur, Pastor/Rawngbawltu an ruahmansak theih tur thu an thlen.

Synod moderator Rev. Dr. C. Lalhlira chuan ZALEN zawhna chhangin, Synod officers meeting-in a ngaihtuah hnuah wedding tourism chu Presbyterian kohhran kalphung nen a inmil loh vangin tih chi ah an ngai lo tih a sawi.

Wedding tourism/Destination wedding-in a tin zawn chu state pawn atanga chawlh hmang a khualzin rawn kal innei duhte a nih rualin, tualchhung mite pawh a huam tho tih thu thudawnna chuan a sawi.