ZALEN, Dec. 03, 2024: Mizorama kohhran lian ber, Mizoram Presbyterian Kohhran chuan Thawhlehni atang hian an inkhawmpui lian ber, Synod Inkhawmpui chu an tan a. Kuminah hian rel tur 35 bakah committee hrang hrang atanga thu lut an nei.

Synod Inkhawmpui vawi 101-na hi Mission Vengthlang Pastor Bialin Mission Vengthlang Kohhran Biak Inah an thleng a, Pathianni zan thleng a awh ang.

Nilaini chawhma atanga Inrinni thleng, chhun lamah rorel palaiten ro an rel ang a, general agenda 35 neiin Synod Executive Coomittee (SEC) leh board hrang hrang atanga thu lut eng emaw zat ngaihtuah tur an nei bawk.

A tan ni-ah hian nilengin Nomination Committee an thu a, zanah vantlang Pathian biak inkhawm awmin inlawmna leh kohhran chanchin report ngaihthlak a ni.

Nilaini zan atang hian zan tin vantlang Pathian biak inkhawm a awm ziah dawn a, inkhawmpui thlarau lam thupui, ‘Lalpa kawng buatsaih’ (Isaia 40:3-5) chu Inrinni zan hian Rev. C. Saikapa, Khatla-in a sawi ang.

Pathianni hian chawhmaah pastor nemngheh an ni ang a, pro. pastor ruat an ni bawk ang a. Chawhnu chu Lalpa Zanriah Sakramen kilho a ni ang a, zanah moderator valedictory sermon a awm ang.

Synod Inkhawmpui hi a hma zawng khan kohhran malin an thleng thin a, kum 2010 atang khan pastor bial-in thleng tan a ni.

2024 Synod Inkhawmpuia Puipate:

Moderator: Rev. R.C. Lalnghakliana

Secretaries: Rev. P.B. Mankima (Sr.) & Upa Vanlalsawma Siakeng (Jr.)

Finance Officers: Rev. V.L. Luaia Hranleh & Rev. P.C. Pachhunga

Statistician: Rev. H. Laltlanthanga

Senior Exe. Secretary: Rev. C. Zorammawia 

Executive Secretary: Rev. Dr. K. Lallawmzuala