ZALEN, Dec. 04, 2024: Mizoram Presbyterian inkhawmpui lian ber, Synod Inkhawmpui 2024 chu Thawhlehnia tan a nih hnuah Nilaini atang khan rorel tan a ni a. Palai hi 1,757 an ni.

Chawhma dar 9:30-a rorel inkhawm tanah palai lawmna, inchhiarna, Synod pawn palai lawmna leh inkhawmpui chibai bukna neih a nih hnuah moderator tang lai, Rev. R. Vanlalnghaka’n Rev. R.C. Lalnghakliana hnenah nihna hlanin rorel zui a ni.

Nomination thu ngaihthlain kum 2025 Synod Inkhawmpui programme leh puipa turte an pawm a. Kum 2025, 2026 leh 2027 inkhawmpui thlengtu tur tihfel sa bakah Synod Inkhawmpui 2028 chu Republic Veng Pastor Bialin College Veng Kohhran Biak Ina thleng turin an ti.

Kum 2025-a Pastoral Ministry thupui atan ‘Inpumkhatna’ Johana 17:11 (b) pawm a ni a, pro. pastor pawh mi 14 lak tura pawm a ni.

Pastor bial thar panga hawn tura pawm zingah Mizoram chhungah Saikhawthlir Bial, pawnah Ludhiana, Amrapara, Tarahara leh Bangnan Bialte a tel a. Hmarthlang, Kolasib leh Teirei Presbytery atangin Bairabi Presbytery thar hawn a ni bawk.

Minister, Pastor leh Pro. Pastor-te awmna tura Pastoral-in ruahmanna a siamte chu inkhawmpui hian a pawm bawk.

General agenda 35 awmah a ni khatnaah hian pali an rel hman a. Teirei Presbytery atanga Synod Mission Board (SMB) member tharte field tlawh tihtawp rawtna lut chu pawm a ni a. Aizawl Bethel Presbytery atanga PCI Emblem-a kraws dah tel rawtna chu Presbyterian Church of India (PCI) General Assembly-a thlen ni se an ti.

Ramlai Presbytery atanga Cancer Hospital bula Synod Khualbuk siam rawtna chu tha tiin Synod Executive Committee (SEC) bawhzui turin an dah a. Aizawl East Presbytery atanga biak ina kohhran hming ziah leh tar inang tlang hman rawtna erawh ‘kan kal dan ngai hi a tawk e’ an ti thung.

Mission Vengthlang Pastor Bialin Mission Vengthleng Kohhran Biak Ina inkhawmpui an thlenah hian palai riak lut 865 awmin lâng 892 an awm bawk.

Thawhlehnia inkhawmpui tanah chhun lamah nomination committee thuin zana vantlang Pathian biak inkhawmah inlawmna leh kohhran chanchin report ngaihthlak a ni.

Nilaini atanga Inrinni thlengin chhunah Synod Rorel a ni dawn a, general agenda 35 bakah SEC/board atanga thu lut eng emaw zat ngaihtuah tur a awm.

Inkhawmpui thlarau lam thupui, ‘Lalpa kawng buatsaih’ (Isaia 40:3-5) chu Inrinni zan hian Rev. C. Saikapa’n a sawi ang.

Pathianni chawhmaah pastor nemngheh leh pro. pastor ruat inkhawm a awm ang a, chawhnuah Lalpa Zanriah Sakramen kilhovin zanah moderator valedictory sermon a ni ang.

Kumin 2024 Synod Inkhawmpui Puipate:

Moderator: Rev. R.C. Lalnghakliana

Secretaries: Rev. P.B. Mankima (Sr.) & Upa Vanlalsawma Siakeng (Jr.)

Finance Officers: Rev. V.L. Luaia Hranleh & Rev. P.C. Pachhunga

Statistician: Rev. H. Laltlanthanga

Senior Exe. Secretary: Rev. C. Zorammawia 

Executive Secretary: Rev. Dr. K. Lallawmzuala