Aizawl: Synod Inkhawmpui vawi 95-na, Electric Veng Kohhran Biak Ina neih mekah nimin khan rorel chhunzawm a ni a, an rorel langsar zingah Mizoram Presbyterian Kohhran din ni January 11 urhsun taka hman rawt thu te, Birth Control avanga Mizote kan tlem zel chungchanga hmalak rawtna leh Kût chi hrang hrang hman chungchanga thu chhuah thar rawtna te a tel a. Kum 2019 - 2020 Synod Budget-ah cheng 3,07,70,43,000 an pawm bawk.   Vawiin chawhma inkhawmah khan Moderator Rev. R Lalhmingthanga’n Pro-Pastor 15 Pastor-ah a nemnghet ang a, Pro-Pastor atana lak thar mi 17 te a dahnghet bawk ang a, chawhnu inkhawmah nikum Inkhawmpui leh kumin Inkhawmpui inkara Pastor thi 6 sunna hun hman a nih dawn bakah Moderator-in Lalpa Zanriah Sacramen a theh ang a, zanah Moderator kal chhuak Rev. F Lalrinnunga’n thuchah a sawi ang.   Mizoram Synod hnuaiah hian Presbytery 51, Pastor bial 304, Kohhran 1113, Minister 574, Pro-Pastor 52, Kohhran Upa 5234, Dan zawhkim 4,22,921 an ni a, Kohhran member zat hi 6,04,512 (mipa 2,95,500 leh hmeichhia 3,09,012) an ni. Kumin 2018 Synod Inkhawmpuia Synod Puipa turte chu : Moderator : Rev. R. Lalhmingthanga Secretaries : Upa R. Dengzikpuia (Sr.) Rev. R. Vanlalnghaka (Jr.) Finance Officers : Rev. P.C. Pachhunga Rev. H. Remthanga Statistician : Rev. R. Lalnuntluanga Executive Secretaries : Rev. Lalramliana Pachuau Rev. B. Sangthanga