Aizawl May 17, 2024 : Vawiin khan Congress Party chuan Congress Bhavan-ah ‘Friday Political Session’ an hmang a. He hunah hian MPCC Vice President Ronald Sapa Tlau chuan thu sawiin, “Kan hotute min hruai dan hi a tha tawk a, kan pawm tlan a ngai a ni. Inlungrualna nen, taimakna nen kan kal chuan sawrkarna hi kan kutah a awm leh ang," a ti.

Congress Vice President chuan, “ZPM sawrkar chuan Thlai pali lei an tum a, chung zingah chuan Hmunphiah lei a lo tul ta a. SEDP pawisa hman bang pawh a awm niin an sawi a, mahse an lei ta lo a. Hmunphiah chingtute beidawng takin an siam a, an rilru a na em em a ni."

“Chief Minister in Portfolio a nei lovang tih te, Minister-in motor pakhat chauh an kawl ang tih te chu a tak a chang ta lo a ni. Valupa Council pawh hian thu an nei tak tak lo niin miten an ngai a ni. Mipuiah beiseina sang tak an siam a, kalphung thar tiin mipui thinlung an hneh a. Mahse mipui beisei an pha ta lo. An kal chhoh zel danah hian term khat bak hi mipui hian an daih an ring ta lo a ni," a ti.

Ronald Sapa chuan, “Chuvangin keimahni ho hian mi tamtak tan kawngka kan lo hawn a, kan lo dawlzawh a ngai a, chutiang tur chuan kan inbuatsaih a ngai a ni. Central lamah te khuan ni tin kan boruak a eng tial tial a, BJP sawrkar khuan Haryana-ah te chuan sawrkarna siam phak tawh si lovin dik lo takin sawrkarna an la kalpui hram hram a, ‘kan chhe lutuk dawn e lo chelh hram hram rawh u’ an ti hial ani. Chuvangin India ramah hian kan boruak a kang zel a ni. Chuvangin theihtawp chhuah ila, inlungrual taka kan kal chuan sawrkarna hi kan chang leh dawn a ni,” a ti.