ZALEN, Mar. 30, 2025: Youth Icon 2024 Lalsangliana (Taitea) official music video hmasa ber, ‘Hmangaihna Runthlak’ chuan a fan-te a rûn mek a, YouTube-a tihchhuah atanga darkar 24 chhungin thlirtu nuai thum chuang a nei hman.

Bawktlang tlangval music video hmasa ber hi Inrinni zan dar 8:30 khan LPS Vision neitu, Lalsawmliana Pachuau-in LPS Studio-ah YouTube-a thlir theih turin a tichhuak a. Hemi atang hian thlirtu an pung nghal char char mek.

‘Hmangaihna Runthlak’ a chhuah atanga ni khat a liam thleng hian Taitea music video hi entu 3,00,692 an awm a, like-tu 51,000 chuang awm tawhin comment pawh 8,028 a awm hman bawk.

Youth Icon intihsiak laia T-Melody hla, ‘Nang lo chuan’ larpuitu, Taitea music video hmasa bera a hla hi ama phuah a ni a, EME Records-a a thun a ni a. Video hi Dr. Reuben Lalmalsawma siamsak niin Shillong, Meghalaya-a an siam a ni.

Youth Icon Top 10 zingah Taitea hi music video siam pariatna a ni a. Ani hma hian Zion Tlaichun, J.Lalrosanga (Rsa), Ramengmawia (Mawimawia), Zothankima (Kimkima), Laldinhlua, Samson Lalhunruata leh Lalbiakkima Hnamte ten official music video an lo siam tawh a ni.

Icon star-ten music video an tihchhuah leh intihsiakna neih laia an hla sakte hi tun laia Mizo rimawi khawvela hla lar ber ber an ni hlawm zel.

Top 5 Rsa’n December 6, 2024-a miin amah an hmelhriat tanna hla, ‘Fuh chiang lo maw!’ music video a tihchhuah phei kha chu ni khat (darkar 24) chhungin entu nuai nga chuang neiin ni hnih tling lo (darkar 41:18 vel) chhungin entu maktaduai a nei hman a, Mizo video-a entu maktaduai nei tling rang ber ni hiala ngaih a ni.

Taitea a music video hmasa ber tlangzarhnaah hian Youth Icon Top 10 zing atangin Peter Lalnunpuia, Rsa, Kimkima leh Samson-a ten an tawiawm a. Judge pathum zing atangin Victor-a’n a telpui bawk.