ZALEN February 15, 2025 : Hmangaihte Ni-ah a fans te'n a perform-naa a hman bik turin cheng nuai 1 vel bawr man wireless Microphone chu Youth Icon 2024 Lalsangliana (Taitea) an pe a; Valentines Day zana a hun hmana a lakluh chu Mizo Artist zingah Mizoram chhunga hmun khat atanga hlawh tam ber record nia hriat a ni bawk.

Taitea Fans Group pakhat 'Gift Box Mizoram leh Singapore' te chuan Taitea hi Sennheiser company siam Digital wireless Microphone hring (Neon green) an pe a, Zirtawpni zana Valentines Day puala Warehouse Cafe Folkland Park-a Concert a neihnaah microphone hi an hlan a ni.

Zirtawpni zan khan Taitea hian Folkland Park-a Warehouse Cafe-ah V Day pualin Concert a nei a. Organiser te'n an sawi danin Taitea hian a hlawh tam hle a, a zat tak hi sawi chiang duh lo mah se, record lo awm sa tawh nia hriat nuai 1.2 lakhs chu he zana an pek hian a khum a ni.

Mizo zaithiam larte hlawh hi a tha chho tawh hle a, chutihrual chuan mimal zaithiam te hian Mizoram chhungah chuan hmun khatah cheng nuai 1 hi an hlawh pha lo tlangpui a. Icon star zingah Concert vawi khatah 1.2 hlawh an lo awm tawh a, chu chu hmun khata hlawhah chuan a tam ber nia hriat a ni a, hei hi Taitea hian a rawn khum ta nia thudawn a ni.

A fans te pek Microphone hi Taitea chuan a theih chuan a zaina hmunah te hman zel a tum dawn a. Microphone petute pawhin hmun hrang hranga hman kual theih tur hi an dap kual nasa nia thudawn a ni.

Khawvela huapa zaithiam lar zualte hian microphone hman bik hi an nei fo thin a. Mizo zaithiam zingah erawh microphone hran, hman bik nei hi an la tam a rinawm loh a, Taitea hi microphone a hran nei hmasa zingah hian a tel tura ngaih a ni.

Taitea chuan a fans ten an duhsakna zo zai chu ropui a tih thu a sawi a, amah hmangaihtuten V Day-ah Microphone man to tak an pe chu a lawm hle tih leh a beisei phak piah lam a nih thu a sawi a; a fans te chu a hmangaih vek thu a sawi.

Youth Icon 2024 star te hi an rate a hniam lo hle a. Hmun khatah hla pakhat an sakin cheng singkhat leh sang nga te an hlawh a, zan khatah hmun 6 emaw hmun 7 ah te an zai chuan nuai 1 hlawh chhuah chang an nei thin a. Mahse hmun pakhata nuai 1 chuang hlawh erawh an tam lo a, an lo awm a nih pawhin chungho zingah chuan Taitea hi a tel lo thei tawh lo.