Aizawl April 20, 2024 : Mizoramah mi tang (prisoner) 1,386 awm theihna jail 10 a awm a, hetihlai hian jail thenkhatah chuan tang awm thei zat (capacity) aia tam tang an awm reng a. Tun dinhmunah dam chhung tang tura thiam loh chantir (convict) tawh mi 57 an awm.

Prison department tar lan danin April 17, 2024 thleng khan Central Jail, Aizawlah mi tang 922 awmin tang awm thei zat erawh 438 a ni.

Central Jail, Aizawlah hian dam chhung tang tura thiam loh chantir tawh mi 54 (mipa vek) awmin mi tang 96 awm theihna, Central Women Jail-ah mi 226 (naupang 19 telin) an awm mek bawk.

Mi tang 90 awm theihna District Jail, Aizawl-ah tang 131 an awm mek a; mi tang 109 awm theihna, District Jail, Lungleiah tang 144 awm mekin tang 92 awm theihna, District Jail, Siaha-ah tang 68 an awm.

Tang 105 awm theihna, District Jail, Champhaiah mi 183 awm mek bawkin mi 134 awm theihna, District Jail, Kolasib-ah tang 134 an awm bawk.

Mi 98 awm theihna, District Jail, Lawngtlaiah tang 39 awm mek bawkin mi tang 128 awm theihna, District Jail, Serchhipah tang 54 an awm a, mi 96 awm theihna, District Jail, Mamitah mi tang 90 an awm mek bawk.

Jail dinhmun tlangpui

1. Tun dinhmuna Mizoram jail 10-a tang awm thei zat chu 1,386 a ni.
2. Tang awm mek zat 1,992 an tling.
3. Tang thei zat aia mi tang tamna zat chu 606 a ni.
4. Central Jail, Aizawl-ah dam chhung tang tur mi 54, District Jail, Kolasib-ah mi pahnih leh District Jail, Lawngtlaiah mi pakhat an awm.