Aizawl: Deputy Chief Minister tawnluia chuan nimin zing khan Mahatma Gandhi lim bul atangin faina hna thawk tur thalai te a vailiam.

Faina hna thawk turte vailiamna inkhawm, UD&PA Director H.Lianzela kaihhruai ah hian thu sawiin deputy Chief Minister chuan, "Tun tum rally in a tum ber chu India ram khawpuite garbage free city anih theihna atana thalaite hmahruai tir leh kaihhruai hi a ni," a ti. Faina leh changkanna kawngah thalaite an pawimawh tih sawiin Tawnluia chuan, "Thalaite hian thil in man zung zung a, chuvangin Mizoram hi ram changkang leh hrisela siam turin thalaite an pawimawh a ni," a ti bawk.

UD&PA Director H.Lianzela sawi danin faina beihpui 'Indian Swachhata League' hi September ni 17,2022 atanga October ni 2,2022 chhungin hman a ni dawn a. Hemi hun chhung hian faina kawnga thalaite hman tangkai chu a tum ber a niin hluihlawn tawh atanga thil tangkai siam leh plastic hman loh te chu a tum ber a ni tih a sawi.

Youth rally a kal te hi team 3 ah insiamin team 1 hi Hrangbana College NSS te an ni a, anni hian Sakawrhmuituai tlang an tifai dawn a. Team 2 te hi Pachhunga University College NSS te niin Muthi Prayer mountain an ti fai ang a. Team 3 te hi Govt. T.Romana College NSS te niin Lalsavunga park. Hlimen an tifai ang.